اسلام آباد(آئی این پی ) پاکستان پیپلزپارٹی اعتز ازاحسن کو صدارتی امیدوار کے طور پر سامنے لانے کے معاملے پر ڈٹ گئی صدارتی امیدوار کے معاملے پر ڈیڈ لاک برقرار، اپوزیشن بدستور تقسیم ،پی پی پی نے مولانا فضل الرحمان سے معذرت کرتے ہوئے کہاکہ اعتزاز احسن ہی صدارتی امیدوار ہوں گے، پیپلزپارٹی کے سینئر رہنما راجا پرویز اشرف کا کہنا ہے کہ کوشش کی جارہی ہے،

متفقہ صدارتی امیدوار کے معاملے کا کوئی درمیانی راستہ نکل آئے ۔ منگل کومنگل کو پیپلز پارٹی کے وفد نے راجہ پرویز اشرف کی سربراہی میں مسلم لیگ (ن)، متحدہ مجلس عمل اور دیگر بعض اپوزیشن جماعتوں کے مشترکہ امیدوار مولانا فضل الرحمان سے ان کی رہائش گاہ پر ملاقات کی جس کے بعد میڈیا سے گفتگو کرتے ہوئے راجا پرویز اشرف نے کہا کہ مولانا فضل الرحمان سے آج ملاقات کی ہے، کوشش ہے صدارتی امیدوار کے معاملے کا مثبت حل نکالا جائے، صدارتی انتخاب کے لئے گفت وشنید جاری ہے ۔اس موقع پر مولانا فضل الرحمان نے کہا کہ آصف زرداری اور اعتزاز احسن سے ذاتی تعلقات ہیں، خواہش ہے صدارتی انتخاب کے لئے اپوزیشن کا متفقہ امیدوار ہو۔مولانا فضل الرحمان نے کہا کہ ایک نکتہ طے ہونا باقی ہے کہ اپوزیشن کامشترکہ امیدوارکیسے لایا جائے، امید ہے کہ دو روز میں معاملے پر اتفاق رائے پیدا ہو جائے گا۔یاد رہے کہ منگل کو آصف زرداری کی زیرصدارت پیپلزپارٹی کا مشاورتی اجلاس ہوا تھا، جس میں تمام ارکان کی جانب سے اعتزازاحسن کا نام واپس لینے کی مخالفت کی گئی۔پی پی اجلاس میں فیصلہ کیا گیا کہ مولانا فضل الرحمان سے باضابطہ معذرت کر لی جائے، جس کے بعد پی پی وفد نے مولانا سے ملاقات کی۔