لاہور( این این آئی)عالمی شہرت یافتہ معروف پاکستانی گلوکار راحت فتح علی خان کو امریکی سفارت خانے نے کنسرٹ میں شرکت کیلئے ویزا جاری کرنے سے انکار کر دیا۔نجی ٹی وی نے ذرائع کے حوالے سے کہا ہے کہ امریکی سفارت خانے کا موقف ہے کہ راحت فتح علی خان کو ویزا حاصل کرنے کیلئے 2015 تا 2023 ٹیکس ادائیگی کے حوالے سے آئی آر ایس ڈاکومنٹیشن اور بولی ووڈ ایونٹ ایل ایل سی کی طرف سے قانونی دستاویزات فراہم کرنا ہوں گی۔
پاکستانی گلوکار نے دعوی کیا ہے کہ انہوں نے امریکہ میں اپنے پروموٹرز کے ذریعے تمام ٹیکسوں کی ادائیگی کر دی تھی۔انہوں نے اپنے پروموٹرز سے ٹیکسوں کی ادائیگی کے مطلوبہ دستاویزات فراہم کرنے کیلئے کہا ہے۔پاکستانی گلوکار نے رواں ماہ 18 نومبر 2023 کو ایسوسی ایشن آف پاکستانی فزیشنز آف نارتھ امریکہ کے زیر اہتمام میوزیکل شو میں شرکت کیلئے امریکہ جانا تھا۔راحت فتح علی خان کے امریکہ میں ہونے والے کنسرٹ کی بکنگ پروموٹر ریحان صدیقی کے ذریعے کرائی ، انہوں نے ہی گلوکار کے ویزے کیلئے درخواست دی اور ضروری دستاویزات سفارت خانے کو فراہم کیں، تاہم سفارت خانے نے ویزا دینے سے انکار کیا ہے۔
