اسلام آباد (مانیٹرنگ ڈیسک) پاکستان ٹیلی ویژن کے معروف ڈرامہ سیریل ’’دھواں‘‘سے شہرت کی بلندیوں پر پہنچنے والے ، فلم ’’مالک ‘‘‘بنانے والے اداکار، ہدایتکار اور مصنف عاشر عظیم نے پاکستان کو ہمیشہ کیلئے خیرآباد کہہ دیا، سوشل میڈیا اکائونٹ پر ملک چھوڑنے کی تصدیق کر دی۔ تفصیلات کے مطابق پاکستان ٹیلی ویژن کے معروف ڈرامہ سیریل ’’دھواں‘‘سے شہرت کی

بلندیوں پر پہنچنے والے ، فلم ’’مالک ‘‘‘بنانے والے اداکار، ہدایتکار اور مصنف عاشر عظیم نے پاکستان کو ہمیشہ کیلئے خیرآباد کہہ دیاہے اور اس بات کی تصدیق انہوں نے اپنے سوشل میڈیا اکائونٹ پر کر دی ہے۔ اپنے سوشل میڈیا پر جاری پیغام میں عاشر عظیم کا کہنا تھا کہ میں نے ملک چھوڑ دیا ہے، کیونکہ میں مایوس ہوگیا ہوں، شریف یا زرداری کی وجہ سے نہیں، یہ تو ہمیشہ ایسے ہی تھے، میں یہاں کے لوگوں سے مایوس ہوگیا ہوں،لوگ اصول کی بات نہیں کرتے، اصول پر نہیں لڑتے، اصول پر ہنستے ہیں، انہیں شریف، زرداری اور راؤ جیسے لوگ ہی ملیں گے، بس نام تبدیل ہوجائیں گے‘۔عاشر عظیم اس وقت شہرت کی بلندیوں پر پہنچ گئے تھے جب ان کا 1992میں شاہکار ڈرامہ سیریل ’’دھواں‘‘پاکستان ٹیلی ویژن کے کوئٹہ سینٹر سے آن ائیر گیا۔ تقریبا۔۔ 20سال بعد اچانک عاشر عظیم پھر دوبارہ منظر عام پر آئے اور انہوں نے فلم مالک کے ذریعے شوبز انڈسٹری میں انٹری دی۔ عاشر عظیم کی اس فلم کو سینسر بورڈ کی جانب سے پابندیوں کا سامنا کرنا پڑا تاہم عاشر عظیم نے ہمت نہ ہاری اور سنسر بورڈ کے فیصلے کے خلاف عدالت سے رجوع کیا، بالآخر وہ کیس تو جیت گئے اور فلم بھی ریلیز ہوگئی، لیکن اس دوران فلم رک جانے کے باعث انہیں کافی زیادہ مالی خسارے کا سامنا کرنا پڑا۔عاشر عظیم پاکستان کسٹمز کے انٹیلی جنس ڈیپارٹمنٹ میں ایک اہم عہدے پر تعینات تھے، لیکن کچھ ناگزیر وجوہات کی بناء پر انہوں نے اپنی ملازمت سے استعفیٰ دیا اور پھر پاکستان بھی چھوڑ دیا اور اب وہ کینیڈا میں ٹرک چلاکر گزر بسر کر رہے ہیں، جس کی تصدیق انہوں نے اپنے ٹوئٹر پیغام میں کرتے ہوئے کہا ہے کہ مجھے اس پر فخر ہے ۔

موضوعات:عاشر عظیم