اسلام آباد(مانیٹرنگ ڈیسک)سیف علی خان کو 47ویں سالگرہ والے دن تحفے کی جگہ سلمان خان کی جانب سے بڑا دھچکا موصول، فلم ’’ریس 3‘‘ سے آؤٹ کرکے سلمان خان کو شامل کرلیا گیا۔ تفصیلات کے مطابق بالی ووڈ کے نامور اداکار سیف علی خان گزشتہ روز پورے 47 برس کے ہوگئے یہ دن انہوں نے اپنی خوبصورت بیوی کرینہ کپوراور بیٹے تیمورعلی خان سمیت اپنی
پوری فیملی کے ساتھ منایا، تاہم سیف کی خوشیاں اس وقت ماند پڑ گئیں جب انہیں پتہ چلا کہ انہیں فلم ’’ریس 3‘‘ سے آؤٹ کرکے سلمان خان کو شامل کرلیا گیا ہے۔واضح رہے کہ سیف علی خان نے 2008 میں کامیاب ترین فلم ’’ریس‘‘ اور ’’ریس 2‘‘ میں مرکزی کردار ادا کیا تھا، فلم میں شائقین نے سیف کی اداکاری کو بے حد پسند کیا تھا جب کہ باکس آفس پر بھی دونوں فلمیں 100 کروڑ سے زائد کا بزنس کرنے میں کامیاب رہی تھیں، فلم ’’ریس‘‘ نے سیف علی خان کے ڈوبتے ہوئے کیرئیر کو سہارا دیا تھا۔ سلمان خان کی جانب سے ریس 3کیلئے ہاں کر دی گئی ہے ۔ میڈیا رپورٹس کے مطابق سلمان خان نے ’’ریس 3‘‘ میں کام کرنے کیلئے شرط رکھی تھی کہ فلم کی ہدایات ریمو ڈی سوزا دیں گے جسے مان لیا گیا ہے، ریموڈی سوزا سلمان خان کے ساتھ کام کرنے کیلئے اتنے پرجوش ہیں کہ انہوں نے اپنی فلم ’’گوڈیڈی‘‘ کی تاریخیں بھی آگے بڑھادی ہیں تاکہ ’’ریس 3‘‘ کی شوٹنگ کا آغاز جلد سے جلد کیا جاسکے۔واضح رہے کہ سلمان خان اور سیف علی خان کے درمیان مثالی دوستی کے چرچے بالی ووڈ میں زبان زدعام ہیں جبکہ اب ریس 3میں سیف علی خان کی جگہ سلمان خان کو فلم دینے سے دونوں کے درمیان دوریاں اور کشیدگی پیدا ہونے کا خدشہ ظاہر کیا جا رہا ہے، فلمی پنڈت آنے والے دنوں میں دونوں کے درمیان کشیدگی کی پیشگوئی کرتے نظر آرہے ہیں۔
