ممبئی (این این آئی)بولی وڈ کے دو کامیاب اداکار شاہ رخ خان اور سلمان خان کئی سالوں بعد ایک ساتھ فلم ’ٹیوب لائٹ‘ میں کام کرتے نظر آئے۔ویسے تو یہ فلم سلمان خان کی تھی، تاہم شاہ رخ خان نے دبنگ خان کی درخواست پر اس فلم میں ایک جادوگر کا مختصر کردار ادا کیا۔اگرچہ ان دونوں کے مداح دوبارہ انہیں ایک ساتھ کسی ایسی فلم میں دیکھنا چاہتے تھے

جس میں سلمان اور شاہ رخ دونوں کا ہی اہم کردار ہو، تاہم اگر آپ بھی ایسا چاہتے ہیں تو اب اس کے لیے 2020 تک کا انتظار کرنا ہوگا۔بولی وڈ لائف کی ایک رپورٹ کے مطابق فلم ’ٹیوب لائٹ‘ کے بعد شاہ رخ خان سے سوال کیا گیا تھا کہ وہ اور سلمان دوبارہ ایک ساتھ کس فلم میں نظر آئیں گے جس پر اداکار نے کہا کہ انہوں نے سلمان خان سے ہدایت کار آنند ایل رائے کے ساتھ بنائی جانے والی اپنی فلم میں ایک مختصر کردار ادا کرنے کی درخواست کی ہے۔تاہم حالیہ انٹرویو میں شاہ رخ خان نے مداحوں کا آگاہ کیا کہ وہ اور سلمان خان اس وقت اپنے اپنے پراجیکٹس کے ساتھ کافی مصروف ہیں، جس کی وجہ سے سال 2020 سے قبل وہ دونوں ایک ساتھ کام نہیں کر پائیں گے۔خیال رہے کہ شاہ رخ خان اور سلمان خان ایک ساتھ متعدد فلموں میں کام کرچکے ہیں جن میں ’کچھ کچھ ہوتا ہے‘، ’ہم تمہارے ہیں صنم‘ اور ’کرن ارجن‘ وغیرہ شامل ہیں۔