ممبئی(این این آئی) بالی ووڈ اداکارہ عائشہ تاکیہ نے اپنے ہونٹوں کی پلاسٹک سرجری سے متعلق خبروں کی تردید کرتے ہوئے کہا ہے کہ ان کی سوشل میڈیا پرزیرگردش تصویر کے ساتھ چھیڑ چھاڑ کرکیاسے تبدیل کیا گیا ہے۔بالی ووڈ فلم ’’ٹارزن‘‘کے ذریعے شہرت حاصل کرنے والی خوبرو اداکارہ عائشہ تاکیہ کو 2009 میں سلمان خان کے ساتھ فلم ’’وانٹیڈ‘‘ نے شہرت کی بلندیوں پر پہنچایا،

اپنی خوبصورتی اور بہترین اداکاری کے ذریعے لوگوں کے دلوں پر راج کرنے والی اداکارہ عائشہ تاکیہ کی کچھ عرصہ قبل سوشل میڈیا پر جاری ہونے والی تصاویر نے ان کے مداحوں سمیت سب کو حیران کر دیا تھا، تصاویر میں اداکارہ کی شخصیت ہونٹوں کی سرجری کروانے کے بعد بالکل ہی بدل گئی تھی، جس پر سوشل میڈیا صارفین نے انہیں تنقید کا نشانہ بناتے ہوئے ان کے اس عمل کو بے وقوفانہ فعل قرار دیا تھا۔کچھ صارفین نے تو یہاں تک کہہ دیا تھا کہ جب آپ کا شوہر ایک مالدار شخص ہو اور آپ کو سمجھ نہ آ رہا ہو کہ یہ پیسہ کہاں خرچ کیا جائے تو ایسا ہی ہوتا ہے جیسا عائشہ تاکیہ کے ساتھ ہوا۔اس وقت تو بالی ووڈ اداکارہ نے لوگوں کی جانب سے کی جانے والی تنقید کو مذاق سمجھ کر ہنسی میں ٹال دیا تاہم اب انہوں نے اس حوالے سے خاموشی توڑتے ہوئے کہا ہے کہ میری تصاویر کے ساتھ کسی نے بہت برا مذاق کیا تھا۔عائشہ تاکیہ نے کہا جب تصاویر سوشل میڈیا پر شیئر ہوئیں تو اس وقت میں گووا میں تھی، حقیقت میں میرا چہرہ چھوٹا ہے

جبکہ سوشل میڈیا پر گردش کرنے والی تصاویر میں چہرہ بڑا نظر آ رہا ہے لہٰذا صاف ظاہر ہے کہ میری تصاویر کے ساتھ کسی نے چھیڑ چھاڑ کی ہے۔واضح رہے کہ اداکارہ عائشہ تاکیہ نے شادی کے بعد شوبز سے کنارہ کشی اختیار کرلی تھی تاہم وہ ایک بار پھر فلم’’زندگی یہ زندگی‘‘کے ذریعے بالی ووڈ میں قدم رکھ رہی ہیں، فلم 19 جون کو ریلیز کر دی گئی ۔