اسلام آباد (مانیٹرنگ ڈیسک) میرا نے سماجی رابطوں کی ویب سائٹ ٹویٹر پر دھوم مچا دی، مریم نواز کے بعد ڈونلڈ ٹرمپ کو بھی دن میں تارے دکھا دئیے۔ تفصیلات کے مطابق لالی ووڈ کی معروف اداکارہ میرا نے سماجی رابطوں کی ویب سائٹ پر ایکٹو ہوتے ہی دھوم مچا دی ہے۔
وزیراعظم کی صاحبزادی مریم نواز کو ملک میں ہونے والی لوڈ شیڈنگ پر کھری کھری سنانے کے بعد میرا جی اب بین الاقوامی منظر نامے پر بھی رائے دیتی نظر آرہی ہیں اور انہوں نے اپنے ایک ٹویٹر پیغام میں امریکی صدر ڈونلڈ ٹرمپ کو آڑے ہاتھوں لیتے ہوئے امریکہ کو مسلم ممالک کی تباہی کا ذمہ دار قرار دیدیا ہے۔ میرا جی کےامریکی صدر کو دبنگ پیغامات نے انہیں ایک بار پھر خبروں کی زینت بنا دیا ہے اور سوشل میڈیا صارفین نے ان کے ٹویٹر پر پیغامات کو سراہتے ہوئے انہیں داد دی ہے۔ سماجی رابطوں کی ویب سائٹ ٹویٹر پر میرا نے قطر کے خلاف امریکی صدرڈونلڈ ٹرمپ کے پیغامات کا جواب دیتے ہوئے کہا ہے کہ ’’امریکہ ایک اور مسلم اکثریت والے ملک پر بم گرانے کی تیاری کر رہا ہے‘‘۔ واضح رہے کہ امریکی صدر اپنے ٹویٹر پیغامات میں قطر کودہشتگردی کی وجہ قرار دے چکے ہیں اور ان کا کہنا تھا کہ یہ خوفناک دہشتگردی کے اختتام کا آغاز ہے۔
