ممبئی (این این آئی)بالی ووڈ فلموں میں بہترین اداکاری کرنے کے بعد اداکارہ کنگنا رناوٹ اب فلموں کی ہدایت کاری کرنے کو تیار ہیں۔فلموں کی ہدایات کرنے کے اعلان کے ساتھ اداکارہ نے اپنی ایک انوکھی شرط بھی سامنے رکھ دی
رپورٹ کے مطابق کنگنا رناوٹ کا کہنا تھا کہ انہوں نے دوسروں کے لیے بہت فلموں میں کام کرلیا، اب وہ صرف اسی فلم میں اداکاری کریں گی، جس کی ہدایت کاری بھی وہ خود کررہی ہوں۔ایک ایونٹ کے دوران اداکارہ نے یہ اعلان بھی کیا کہ وہ اگلے سال ایک کامیڈی فلم کو ڈائیریکٹ کریں گی۔3 مرتبہ نیشنل ایوارڈ اپنے نام کروانے والی کنگنا کے مطابق ’میں نے گزشتہ 11 سالوں میں جو کچھ بھی کیا اس کی وجہ سے میں آج یہاں تک آپائی ہوں، میں 30 سال کی ہوں اور اب مجھے نہیں لگتا کہ کسی اور ہدایت کار کے ساتھ کام کیا جائے، میں خود ایک ہدایت کار بنوں گی، اب میں اپنے کیریئر میں آگے بڑھوں گی اور اْسی فلم میں کام کروں گی جس کی ہدایات میں خود دوں۔خیال رہے کہ فلم ’کوئین‘ سے بولی وڈ میں اہم جگہ بنانے والی کنگنا رناوٹ کی رواں سال ریلیز ہوئی فلم ’رنگون‘ باکس آفس پر ناکام ثابت ہوئی۔وہ اس وقت اپنی فلموں ’منی کرنا‘ اور ’سمرن‘ کی شوٹنگ میں مصروف ہیں۔
