ممبئی(شوبز ڈیسک) بالی ووڈ میں مسٹر پرفیکشنسٹ کے نام سے پکارے جانے والے عامر خان نے سنجے دت کی زندگی پر بنائی جانے والی فلم میں ان کے والد سنیل دت کا کردار ادا کرنے سے انکار کر دیا ۔ اس قبل وہ یہ کردار ادا کرنے کی حامی بھر چکے تھے مگر شوٹنگ شروع ہونے سے چند روز قبل ہی انہوںنے یہ کردار ادا کرنے سے معذرت کر لی ہے ۔
بالی ووڈ کے مشہور اداکار سنجے دت کی زندگی پر بنائی جانے والی فلم میںرنبیر کپور سنجے دت کا کردار ادا کریں گے ، راجو ہیرانی کی ہدایت کاری میں بننے والی اس فلم میں سنجے دت کی پوری زندگی دکھائی جائے گی ۔ جبکہ عامر خان نے کہانی پڑھنے کے بعد سنیل دت یعنی رنبیر کپور (سنجے دت ) کے والد کا کردار ادا کرنے میں دلچسپی ظاہر کی تھی مگر اب عامر خان نے مصروفیا ت کی بنا پر یہ کردار ادا کرنے سے معذرت ظاہر کی ہے جس کے بعد خدشہ ظاہر کیا جا رہا ہے کہ فلم کی شوٹنگ جو چند روز میں شروع ہونے والی تھی اب تاخیر کا شکار ہو جائے گی ۔ اس فلم میں کسی اداکارہ کا نام ابھی تک نہیں بتایا گیا مگر کچھ رپورٹس کے مطابق سونم کپور اس فلم میں رنبیر کے مقابل نظر آئیں گی ۔ واضح رہے کہ سونم اور رنبیر نے فلم نگری میں ایک ساتھ فلم سانوریا کے ساتھ قدم رکھا تھا جس کے بعد ان دونوں نے کوئی فلم نہیں کی۔

موضوعات:عامر خان