ممبئی(این این آئی) بھارتی ٹی وی اداکارہ اور ٹی وی شوز کی میزبان شویتا تیواری کے ہاں ننھے مہمان کی آمد متوقع ہے۔بھارتی ٹی وی اداکارہ شویتا تیواری نے 2001 میں نشر ہونے والے ڈرامے ‘‘کسوٹی زندگی کی’’ سے شہرت حاصل کی جس کے بعد انہوں نے کئی ڈراموں میں اداکاری کے جوہر دکھائے جب کہ انہوں نے کئی ریئلٹی شوز میں حصہ بھی لیا اور 2011 میں ریئلٹی شو بگ باس کی فاتح بھی رہیں۔ شویتا تیواری 2013 میں اداکار ابیہناؤ کوہلی کے ساتھ رشتہ ازدواج میں منسلک ہوئیں ٗشویتا تیواری اداکاری کے ساتھ کئی ٹی وی شوز میں میزبانی کے فرائض بھی انجام دے چکی ہیں۔ 2009 میں انہوں نے ‘‘جھلک دکھلاجا’’ کے سیزن 3 کی میزبانی کی جس کے بعد انہیں ‘‘کامیڈی سرکس کا نیا دور’’ اور ‘‘رنگولی’’ جیسے ٹی وی شوز میں بھی میزبانی کے مواقع ملے۔ اداکارہ نے بالی ووڈ فلم نگری میں بھی قدم رکھا تاہم وہاں قدم نہ جما سکیں جس کے بعد انہیں دوبارہ چھوٹی اسکرین کی طرف لوٹنا پڑا اور ایک مرتبہ پھر وہ کئی ڈراموں میں اداکاری کے جوہر دکھا رہی ہیں۔واضح رہے کہ اداکارہ نے 1998 میں اداکار راجا چوہدری سے شادی کی جو 9 سال تک برقرار رہی جن سے ان کی ایک بیٹی بھی ہے لیکن 2007 میں دونوں کے درمیان طلاق ہوگئی۔