لاس اینجلس (نیوز ڈیسک) ہالی ووڈ اداکار سلویسٹر سٹالون بے شک ہالی ووڈ کے مقبول ترین سٹار ہیں لیکن اپنی بیٹیوں کے لئے وہ مشرقی باپ ثابت ہوئے ہیں اور انہوں نے اپنی بیٹیوں کے ڈیٹ پر جانے پر پابندی عائد کر رکھی ہے۔ سلویسٹر سٹالون کی تین بیٹیاں ہیں جن میں 18 سالہ سوفیا، 16 سالہ سسٹائن اور 13 سالہ سکارلٹ شامل ہیں۔

ایک انٹرویو میں سلویسٹر سٹالون نے اپنی بیٹیوں کے ساتھ غیر دوستانہ تعلقات کا ذکر کیا۔ انہوں نے کہا کہ چار سال قبل جب سوفیا 14 سال کی تھی تب اس کے بوائے فرینڈ نے پہلی بار اسے فون کیا اور ڈیٹ پر بلایا۔ مجھے علم ہوا تو میں نے اس کی مخالفت کی کیونکہ میں ایسا باپ نہیں بننا چاہتا جو ہر چیز قبول کر لیتا ہوں۔ میں نے اپنی بیٹیوں کو بتا دیا کہ جب تک وہ 40 سال کی نہیں ہو جاتیں، میں انہیں ڈیٹنگ کی اجازت نہیں دے سکا۔ انہوں نے کہا کہ میرا یہ فیصلہ میری بیٹیوں کو زیادہ پسند نہیں آیا اور ہمارے درمیان تعلقات زیادہ دوستانہ نہیں ہیں ۔ انہوں نے کہا کہ میری بیٹیاں میرے ساتھ باہر گھومنا پھرنا پسند نہیں کرتیں، اگر میں کبھی انہیں سکول ڈراپ کرنے کی پیشکش کرتا ہوں تو بھی وہ بس سے جانا پسند کرتی ہیں۔ ان کے سکول کے تمام ٹیچر اور بچے میرے دیوانے ہیں اور مجھے دیکھنا چاہتے ہیں لیکن میری بیٹیوں کو یہ پسند نہیں ہے۔