اسلام آباد(مانیٹرنگ ڈیسک) مائیکرو سافٹ نے 2018 کا اختتام دنیا کی سب سے زیادہ ویلیو والی کمپنی کے اعزاز کے ساتھ کیا مگر اس کے ساتھ ساتھ ایک اہم سنگ میل بھی طے کرلیا۔ اس کمپنی کے ونڈوز 10 آپریٹنگ سسٹم نے آخرکار دنیا کے مقبول ترین ڈیسک ٹاپ آپریٹنگ سسٹم بننے کا اعزاز اپنے نام کرتے ہوئے ونڈوز 7 کو ہرا دیا ہے۔ نیٹ اپلیکشنز کی ایک رپورٹ کے مطابق

ونڈوز 10 دسمبر 2018 میں 39.22 فیصد صارفین کی پسند بن گیا جبکہ ونڈوز 7 کے صارفین 36.9 فیصد ہے۔ ونڈوز 10 کو سب سے مقبول آپریٹنگ سسٹم بننے کے لیے ساڑھے 3 سال کا عرصہ لگا اور اس سے اندازہ ہوتا ہے کہ لگ بھگ 10 سال پرانی ونڈوز 7 لوگوں میں کتنی مقبول ہے۔ مائیکروسافٹ نے 2015 میں ونڈوز 10 آپریٹنگ سسٹم کو متعارف کرایا تھا تو اس کا خیال تھا کہ 3 سال میں اس پر چلنے والی ڈیوائسز کی تعداد ایک ارب تک پہنچ جائے گی مگر اسے ناکامی کا سامنا ہوا اور ٹائم لائن کو آگے بڑھا دیا گیا۔ اس کی ایک وجہ ونڈوز فون کی ناکامی بھی ہے۔ اس وقت ونڈوز 10 استعمال کرنے والی ڈیوائسز بشمول کمپیوٹرز، ٹیبلیٹس، فونز اور ایکس باکس کنسولز وغیرہ کی تعداد 70 کروڑ سے زیادہ ہے۔ اس کے مقابلے میں ونڈوز 7 کی پوزیشن حالیہ برسوں میں مضبوط نظر آئی حالانکہ مائیکرو سافٹ نے ونڈوز 10 فری اپ گریڈ کرنے کی مہم بھی چلائی۔ تاہم اب ونڈوز 10 نے اہم سنگ میل اس وقت طے کیا ہے جب مائیکروسافٹ کی جانب سے ونڈوز 7 کی سپورٹ ایک سال بعد ختم کی جارہی ہے۔