نیویارک(مانیٹرنگ ڈیسک) ’ایپل واچ‘پہلے ہی اپنے صارفین میں بہت مقبول ہو چکی ہے اور اب کمپنی اس کا ایسا ماڈل متعارف کروانے جا رہی ہے کہ اس کے بعد آئی فون کی شاید ضرورت ہی نہ رہے گی۔ میل آن لائن کی رپورٹ کے مطابق ایپل سمارٹ واچ کے موجودہ ماڈلز کو پیغامات بھیجنے یا میوزک سننے کے لیے آئی فون کے ساتھ منسلک کرنا پڑتا ہے لیکن یہ نیا ماڈل ’ایل ٹی ای‘ صلاحیت کا حامل ہو گا جس کے باعث آئی فون سے منسلک کیے بغیر سمارٹ واچ سے نہ صرف پیغامات بھیجے جا سکیں گے بلکہ کالز بھی کی جا سکیں گی۔
سمارٹ واچ کے اس نئے ماڈل کے لیے ایل ٹی ای موڈیمز ’Intel Corp‘ فراہم کرے گی۔ سپرنٹ، ٹی موبائل، ورژن اور دیگر کئی کمپنیاں اس نئی ایپل سمارٹ واچ کو فروخت کرنے کی منصوبہ بندی کر رہی ہیں۔رپورٹ کے مطابق سمارٹ واچ کا یہ نیا ماڈل رواں سال میں ہی مارکیٹ میں متعارف کروا دیا جائے گا۔واضح رہے کہ آمدنی کے اعتبار سے سمارٹ واچز ایپل کمپنی کا بہت چھوٹا حصہ ہیںتاہم گزشتہ ہفتے کمپنی کے چیف ایگزیکٹو آفیسر نے بتایا ہے کہ گزشتہ سہ ماہی میں ایپل واچ کی فروخت میں ریکارڈ 50فیصد اضافہ ہوا ہے۔