نیویارک(این این آئی)پاکستان جیسے ممالک میں انٹرنیٹ کی سست رفتار یا کام نہ کرنا معمول کا حصہ ہے مگر اب کم از کم کروم برائوزر پر آپ بغیر انٹرنیٹ کے بھی برائوزنگ کرسکیں گے۔میڈیارپورٹس کے مطابق گوگل نے اپنے ویب برائوزر کے لیے نئے فیچرز متعارف کرائے جو کہ انٹرنیٹ سے محروم صارفین کے لیے ویب برائوزنگ کو ممکن بناتے ہیں۔ویسے تو گوگل نے گزشتہ سال کروم میں ویب پیجز ڈائون لوڈ کرنے کا
فیچر متعارف کرایا تھا جس کے ذریعے بغیر انٹرنیٹ کے بھی ان پیجز کو دیکھنا ممکن ہے۔اب اس کی کامیابی دیکھتے ہوئے گوگل نے اس میں مزید نئے اضافے کرتے ہوئے اس فیچر کو مزید بہتر بنایا ہے۔اس حوالے سے ایک نیا اضافہ ڈائون لوڈ لنک کا ہے جس میں آپ کسی بھی ویب پیج کو برائوزر پر موجود لنک کو کچھ دیر دبا کر سیو کرسکیں گے۔کچھ دیر تک لنک کو دبا کر رکھنے پر ڈائون لوڈ لنک کا آپشن سامنے آئے گا جس سے وہ پیج آف لائن دیکھنے کے لیے سیو ہوجائے گا اور اس تک رسائی کسی بھی وقت ممکن ہوگی، جسے جب آپ چاہیں ڈیلیٹ بھی کرسکیں گے۔اسی طرح آپ کو ویب سائٹ اوپن کرتے ہیں مگر انٹرنیٹ کام نہیں کرتا تو ایک ڈائنا سور بنا آجاتا ہے۔اس کے نیچے آپ کو ڈائون لوڈ پیج لیٹر کا آپشن یا بٹن نظر آئے گا جو کہ اس پیج کو آن لائن ہوتے ہی محفوظ کر دے گا۔اس محفوظ ہونے والے ویب پیج تک جانا بھی کافی آسان ہے، آپ کو بس کروم پر ایک نیا ٹیب اوپن کرکے ڈائون لوڈز کو اسکرول کرنا ہوگا۔
