نیویارک(نیوزڈیسک) معروف بین الاقوامی ٹیکنالوجی کمپنی ایپل چین میں آئی فون کے ٹریڈ مارک کا مقدمہ ہار گئی ہے۔میڈیا رپورٹ کے مطابق معروف بین الاقوامی ٹیکنالوجی کمپنی ایپل چین میں آئی فون کے ٹریڈ مارک کا مقدمہ ہار گئی اس کا مطلب ہے کہ چین میں ہینڈ بیگ اور چمڑے کی دوسری مصنوعات بنانے والی کمپنی شنتونگ ٹیاندی آئی فون ٹریڈ مارک کا استعمال کرتی رہے گی ٗسرکاری اخبار لیگل ڈیلی کے مطابق بیجنگ میونسپل ہائی پیپل کورٹ نے شنتونگ کے حق میں فیصلہ سنایا ٗخیال رہے کہ شنتونگ نے چین میں 2010 میں اپنی چمڑے کی مصنوعات کیلئے آئی فون نامی ٹریڈ مارک حاصل کیا تھا ٗایپل نے اس نام کا انتخاب 2002 میں الیکٹرانک مصنوعات کیلئے کیا تھا تاہم اسے 2013 تک منظوری نہیں مل سکی تھی ٗلیگل ڈیلی میں یہ رپورٹ اپریل کے اواخر میں شائع ہوئی تھی تاہم بعد میں اس کی زیادہ تشہیر ہوئی ٗشنتونگ آئی فون ٹریڈ مارک کے ساتھ ہینڈ بیگ، موبائل فون کے ڈبے اور چمڑے کی دوسری مصنوعات فروخت کرتی ہے۔سب سے پہلے 2012 میں ایپل نے چین میں ٹریڈ مارک کے حکام کے پاس اس کی شکایت کی تاہم وہاں ناکام ہونے پر اس نے بیجنگ کی ایک ذیلی عدالت میں مقدمہ دائر کیاتاہم دونوں عدالتوں نے ایپل کے خلاف فیصلہ سنایا کہ جس کے بعد اس نے اعلیٰ عدالت میں اپیل کی۔