کراچی(نیوزڈیسک) اقتصادی رابطہ کمیٹی نے جمعہ کو پہلی ٹیلی کمیونی کیشن پالیسی کی منظوری دی جس میں موبائل اور آئی ٹی کمپنیوں کو وسیع مراعات دی گئی ہیں اور انہیں واٹر لیس، سیٹلائٹ کے ذریعہ افغانستان، ایران، انڈیا، پاکستان کے ساتھ ٹریفک کالز کی اجازت دے دی گئی ہے، روزنامہ جنگ کے صحافی خالدمصطفی کے مطابق متعلقہ کمپنیاں اس کیلئے سیکورٹی اداروں سے این او سی لینے کی پابند ہوں گی۔ سرحد پار فکسڈ لائن سروس کیلئے متعلقہ کمپنیوں کو کمیٹی سے منظوری بھی لینا ہو گی، کمیٹی میں وزارت انفارمیشن ٹیکنالوجی، وزارت داخلہ، پی ٹی اے، سیکورٹی ایجنسیوں اور کابینہ ڈویژن کے نمائندے شامل ہوں گے۔ پالیسی کے تحت ڈی ٹی ایچ آپریٹرز کو سیٹلائٹ انٹر نیٹ سروس تک رسائی کی اجازت ہوگی، پیمرا سے لائسنس یافتہ ڈی ٹی ایچ آپریٹرز ٹی وی چینلز سروس کے ساتھ سیٹلائٹ انٹر نیٹ سروس فراہم کرنے کے پابند ہوں گے، موبائل فون کمپنیوں کو باہمی طورپر 3Gاور 4Gاسپیکٹرم اورٹاورز استعمال کرنے کی اجازت دیدی گئی تاہم باہمی سہولتوں کے اس استعمال کے لئے پی ٹی اے سے اجازت لینا ہوگی ۔