ڈھاکہ(نیوز ڈیسک) بنگلہ دیشی حکومت کو ایک طنزیہ مضمون میں مذاق کا نشانہ بنانے پر ایک معروف مصنف کو گرفتار کرلیا گیا۔یہ واقعہ بنگلہ دیش میں ایک ایسے وقت میں پیش آیا، جب حکومت نے سیکیورٹی وجوہات کی بنا پر فیس بک پر لگائی جانے والی پابندی کو 3 ہفتوں کے بعد اٹھایا۔غیر ملکی خبر رساں ادارے کے مطابق ایلیٹ فورسز کے ترجمان میجر رومان محمد نے بتایا کہ ریپڈ ایکشن بٹالین (آر اے بی) کے افسران نے رفعت احمد کو ملک کے متنازع انٹرنیٹ قانون کے تحت فیس بک پر ایک پوسٹ لگانے پر گرفتار کیا۔ترجمان کا کہنا تھا کہ مصنف کو فیس بک پر حکومت کے خلاف اشتعال انگیز تحریر لگانے پر گرفتار کیا گیا۔ آر اے بی نے احمد پر ان کے قلمی نام ”موجا لوس“ یا ”کیا آپ مذاق بنارہے ہیں“ کے ذریعے اپنی تحریر لگانے کا الزام لگایا ہے، جس میں کرپشن اور امن و امان کے مسائل کے ساتھ ساتھ بنگلہ دیش کے قدامت پسند معاشرے کو ایک طنزیہ نظر سے دیکھا گیا تھا۔واضح رہے کہ مذکورہ فیس بک پیج، جس پر 7 لاکھ سے زائد پرستار موجود ہیں، نے گذشتہ ماہ بنگلہ دیشی حکومت کو سیکیورٹی کو وجہ بنا کر فیس بک، موبائل میسنجر، واٹس ایپ اور وائبر پر پابندی لگانے پر بھی تنقید کا نشانہ بنایا تھا –