اسلام آباد(نیوز ڈیسک ) جرمن کمپنی نے ایسا روبوٹ تیار کرنے کا دعویٰ کیا ہے کہ جو فصلوں میں خود سے اگنے والی مضر جڑی بوٹیوں کو درستگی سے ختم کرکے فصلوں کو نقصان سے محفوظ رکھتا ہے۔اسے جرمن کمپنی کے ڈیپ فیلڈ روبوٹکس نے محکمہ خوراک اور چند یونیورسٹیوں کے تعاون سے بنایا ہے، یہ روبوٹ ناقابلِ یقین تیزی سے گھاس پھوس اور جڑی بوٹیوں کو تلف کرتا ہے اور اگر انہیں ختم نہ کیا جائے تو وہ فصلوں کی غذائیت اور توانائی چوس لیتے ہیں اوریوں فصلوں کو نقصان پہنچتا ہے۔
روبوٹ کا خصوصی نظام ایک سینٹی میٹر تک کی بھی گھاس پھوس جڑ سے اکھاڑ دیتا ہے اور ایک سیکنڈ میں دو تنکوں کو کاٹتا ہے اور کوئی انسان بھی اس رفتار کو نہیں پہنچ سکتا، روبوٹ کی جسامت ایک چھوٹی کار کے برابر ہے اور اس میں لیزر ریڈار وڑن سسٹم ہے، یہ گھاس پھوس اکھاڑنے کا فیصلہ مصنوعی ذہانت ( آرٹیفشل انٹیلیجنس) کی بنیاد پر کرتا ہے اور اس کا نظام ایک کارآمد پتے اور ایک بے کار گھاس میں تمیز کرسکتا ہے۔ دنیا بھر میں درانتیوں سے گھاس اور جڑی بوٹیوں کو صاف کیا جاتا ہے جب کہ انہیں مارنے کی دوا مہنگی ہوتی ہیں اور خطرناک اثرات مرتب کرتی ہیں۔
کمپنی کا کہنا ہےکہ جب اس روبوٹ کو گاجروں کے کھیت میں استعمال کیا گیا تو 90 فیصد گھاس پھوس کو بہت تیزی سے صاف کردیا جب کہ اب یہ روبوٹ دوسرے کھیتوں میں ا?زمایا جارہا ہے اور یہ 24 گھنٹے تک کام کرتا رہتا ہے۔