اسلام آباد(نیوزڈیسک) مائیکروسافٹ نے اینڈرائیڈ ڈیوائس کے لیے اپنی اسکائپ اپلیکشن کا اپ ڈیٹ ورڑن متعارف کرایا ہے جس میں چند نئے فیچرز کو شامل کیا گیا ہے جو یقیناً مددگار ثابت ہوں گے۔ اس انسٹنٹ میسجنگ اور ویڈیو چیٹ اپلیکشن میں صارفین اب دیگر چیزوں کے ساتھ اپنی پسند کے ویڈیو پیغامات بھی اسمارٹ فونز پر محفوظ کرسکیں گے۔ اینڈرائیڈ کے لیے اسکائپ 6.11 ورڑن میں صارفین کو ویڈیو میسج سیو کرنے کی سہولت دی گئی ہے۔ اس کے لیے انہیں بس ویڈیو میسج پر کلک کرنا ہوگا اور پھر وہ اسے اپنی ڈیوائس کی فوٹو گیلری میں محفوظ کرسکیں گے، اس فیچر کا مطالبہ صارفین کافی عرصے سے کررہے تھے۔ اسی طرح صارفین اب اپنے کانٹیکٹ یا چیٹ پر کچھ دیر تک کلک کرکے رکھیں گے تو ان کے سامنے ایک ٹول بار کھل جائے گا جس کی مدد سے وہ اس فرد کے بھیجے گئے تمام پیغامات کو ریڈ یا مکمل طور پر میوٹ نوٹیفکیشنز میں ڈال سکتے ہیں۔ اسکائپ نے اپنے بلاگ پوسٹ میں ان فیچرز کا اعلان کرتے ہوئے بتایا کہ اپلیکشن کے لیے سرچ کی فعالیت کو بھی بڑھایا گیا ہے اور اب صارفین اپنی سابقہ بات چیت میں سے بھی مواد سرچ کرسکتے ہیں جبکہ یہی کام کانٹیکٹس اور گروپ ناموں میں بھی ہوسکتا ہے۔ اینڈرائیڈ کے لیے نئے اسکائپ ورڑن میں صارفین کو یہ موقع بھی دیا گیا ہے کہ وہ اپنی ڈیوائس کی فوٹو گیلری سے تصاویر کو گروپ بات چیت میں شیئر کرسکیں۔ مانے یا نہ مانے مگر اس سے پہلے گروپ چیٹنگ میں اس طرح تصاویر شیئر کرنا ممکن نہیں تھا۔ اسکائپ نے اس نئے ورڑن میں صارفین کے لیے موجیز کو بھی اپ گریڈ کیا ہے۔