اسلام آباد(نیوز ڈیسک )ہر گزرنے والا دن مریخ پر ایلین کی زندگی کے بارے میں کوئی نہ کوئی ثبوت سامنے لا رہا ہے اورسائنس دان اب سنجیدگی سے اس بارے میں حکمت عملی تشکیل دے رہے ہیں کہ ایلین سے کیسے نمٹا جائے جب کہ اسی دوران اب ایک اور فوٹو میں انکشاف ہوا ہے کہ ایک بڑا چوہا مریخ کی سرزمین پر سیر و تفریح کے مزے لے رہا ہے۔
میڈیا رپورٹس کے مطابق مریخ سے موصول ہونے والی تصاویر کو دیکھ کر سائنسدان اس وقت حیران ہوگئے جب ایک بڑا چوہا انہیں مریخ کی سرزمین پر بیٹھا نظر آیا اور اس کے انداز سے لگ رہا ہے کہ یہ چوہا زندہ ہے اور اپنے کھانے کی تلاش میں مصروف ہے۔ آرٹ ایلین ٹی وی کے اسکرین پر نظرآنے والے مناظر نے دیکھنے والوں کو حیرت اور تجسس میں ڈال دیا۔ سائنس دانوں کا کہنا ہے کہ ہو سکتا ہے یہ نظر کا دھوکہ ہو لیکن اس چوہے کے بڑے کان، آنکھیں اور ناک اس کی نفی کر رہے ہیں اور اس حقیقت کو تقویت دے رہے ہیں کہ یہ کوئی زندہ چوہا یا اس سے ملتا جلتا کوئی زندہ جانور ہے۔
فلکیات میں دلچسپی رکھنے والوں کاکہنا ہے کہ اس میں کوئی شک نہیں کہ مریخ پر کئی ایسی چٹانیں ہیں جن کی شکلیں ہماری روزمرہ کی اشیا سے ملتی جلتی ہیں لیکن تصویرمیں واضح طور پر چوہا نظرآرہا ہے اور صاف محسوس ہورہا ہے کہ وہ اپنے کھانے کی تلاش میں سرگرداں ہے۔ ماہرین فلکیات کا کہنا ہے کہ کچھ روز قبل ناسا کی براہ راست فیڈ پر اچانک ایلین کا نظرآنا اور جرمنی میں یو ایف او کا گرنا اس بات کی جانب اشارہ کر رہے ہیں کہ کوئی خلائی مخلوق زمین کی طرف بڑھ رہی ہے۔