اسلام آباد (نیوز ڈیسک)اگر تو آپ سماجی رابطے کی ویب سائٹ فیس بک پر خوشی کا اظہار ہاہا سے کرتے ہیں تو مبارک ہو آپ کی طرح 51 فیصد سے زائد لوگ بھی مسرت کا اظہار اسی طرح کرتے ہیں۔یہ دلچسپ انکشاف فیس بک کی اپنی ایک تحقیق میں سامنے آیا ہے۔
تحقیق میں بتایا گیا ہے کہ فیس بک پر 51.4 فیصد افراد خوشی کے اظہار کے لیے ہا ہا، 33.7 فیصد مسکراہٹ کے کارٹونز، 12.7 فیصد ہی ہی جبکہ 1.9 فیصد lol کو اپناتے ہیں۔ تحقیق میں یہ دلچسپ انکشاف ہوا ہے کہ 46 فیصد کے قریب افراد ایک ہفتے میں محض ایک بار ہی کسی بھی طریقے سے ہنسنے کا اظہار کرتے ہیں۔ فیس بک کے مطابق 52 فیصد ہنسی کے اظہار کے لیے ایک ہی انداز کو اپناتے ہیں اور بمشکل 20 فیصد 2 مختلف طریقوں کو آزماتے ہیں۔ فیس بک کے محققین نے یہ نتیجہ نکالنے کے لیے مئی کے آخری ہفتے میں فیس بک کی پوسٹس اور کمنٹس کا جائزہ لیا۔ محققین کا کہنا تھا کہ نوجوان اور خواتین کارٹون اسمائلیز یا اموجیز کو ترجیح دیتے ہین جبکہ مردوں کی پسندیدہ ہنسی ہاہا اور ہی ہی ہے۔