اسلام آباد (نیوزڈیسک ) اگر آپ اپنے ارد گرد موجود لوگوں کے احساسات اور جذبات جاننا چاہتے ہیں تو اس کے لئے پریشان ہونے کی ہرگز ضرورت نہیں کیونکہ مائیکروسافٹ نے ایک ایسی عینک کی تیاری پر کام شروع کردیا ہے جسے پہن کر آپ اپنے اطراف میں موجود لوگوں کے موڈ اور ان کے احساسات کے بارے میں پتہ لگا سکیں گے۔امریکا کے پیٹنٹ اینڈ ٹریڈ مارک آفس کے مطابق مائیکروسافٹ اس وقت ایک ایسے چشمے کی تیاری میں مصروف ہے جس کو پہن کر آپ اپنے ارد گرد موجود لوگوں کے احساسات کو سمجھنے کے قابل ہوجائیں گے جدید ترین ٹیکنالوجی کا شاہکار یہ نظام ایک عینک، سر پر پہنے جانے والے ایک شفاف ڈسپلے اور ایک سینسر پر مشتمل ہو گا جو اپنی مقررہ حد میں آنے والے انسانوں کے صوتی اور بصری تاثرات بھانپ لیتا ہے۔ یہ نظا م اپنے مائیک، کیمرے اور دیگر حساس سینسرز کو استعمال کرتے ہوئے انسانی چہرے کے تاثرات، حرکات، انداز گفتگو اور ماحول میں ہونے والی تبدیلیاں مثلا درجہ حرارت اور آواز کی کوالٹی کو بھی سمجھ سکے گا۔