اسلام آباد (نیوز ڈیسک) لاہور کی سیشن عدالت میں غیر ملکی خاتون سے مبینہ زیادتی کے مقدمے میں نامزد ملزم احمد تنویر کی عبوری ضمانت سے متعلق درخواست پر سماعت نہ ہوسکی،
ایڈیشنل سیشن جج رفاقت علی گوندل نے کیس سننے سے معذرت کرلی۔عدالت نے اپنے ریمارکس میں بتایا کہ معاملے سے متعلق ریفرنس پہلے ہی لاہور ہائی کورٹ کو بھجوایا جا چکا ہے، جس کے باعث اس کیس کی سماعت ممکن نہیں ہوسکی۔سماعت کے دوران ملزم احمد تنویر کی جانب سے وکیل صفدر شاہین پیرزادہ ایڈووکیٹ پیش ہوئے۔ تاہم عدالتی کارروائی آگے نہ بڑھ سکی، جس کے بعد وکیل نے ملزم کی حاضری سے استثنیٰ کی درخواست دائر کردی۔درخواست میں مؤقف اختیار کیا گیا کہ ڈیانا نامی غیر ملکی خاتون سے مبینہ زیادتی کے مقدمے میں احمد تنویر کی عبوری ضمانت منظور کی گئی تھی۔
وکیل کے مطابق ملزم کی عبوری ضمانت سے متعلق آج عدالت میں پیشی مقرر تھی، تاہم ضمانت کی مدت مکمل ہونے کے باعث وہ پیش نہیں ہوسکا، لہٰذا عدالت سے استدعا کی گئی کہ اس کی حاضری معاف کی جائے۔درج مقدمے کے مطابق احمد تنویر سمیت ملزمان کے خلاف ڈیفنس سی پولیس نے کارروائی کرتے ہوئے مقدمہ درج کیا تھا۔
