اسلام آباد (نیوز ڈیسک) وفاقی دارالحکومت اسلام آباد میں یومِ سیاہ کے سلسلے میں منعقد ہونے والی کشمیر واک کے پیش نظر متعدد اہم شاہراہوں پر ٹریفک کی روانی متاثر ہونے کا خدشہ ہے۔

اسلام آباد ٹریفک پولیس نے صبح 7 بجے سے واک کے اختتام تک ٹریفک کی آمدورفت کے لیے متبادل انتظامات کا اعلان کرتے ہوئے شہریوں کو ہدایت کی ہے کہ وہ سفر کے دوران متبادل راستوں کا انتخاب کریں۔ٹریفک پولیس کے مطابق شاہراہِ جمہوریت پر سیکرٹریٹ سے فرانس ٹرن تک ٹریفک کو متبادل راستوں پر منتقل کیا جائے گا۔ اس دوران شہریوں کو مارگلہ روڈ استعمال کرنے کی ہدایت کی گئی ہے تاکہ انہیں آمدورفت میں کم سے کم مشکلات کا سامنا کرنا پڑے۔اسی طرح ڈھوکری چوک اور سرینا ہوٹل سے فرانس ٹرن کی جانب جانے والی سڑکوں پر بھی ٹریفک متاثر ہونے کا امکان ہے۔ ان علاقوں سے گزرنے والے افراد ایمبیسی روڈ اور اتاترک روڈ کے ذریعے اپنی منزل تک پہنچ سکتے ہیں۔ٹریفک پلان کے تحت شمس کالونی سے ریڈیو پاکستان جانے والی ٹریفک کو بھی ڈائیورٹ کیا جائے گا۔ اس روٹ پر سفر کرنے والے شہریوں کو بری امام اور تھرڈ ایونیو کا راستہ اختیار کرنے کا مشورہ دیا گیا ہے۔پولیس کی جانب سے جاری کردہ ہدایات کے مطابق ایف بی آر چوک اور وحید شہید چوک سے سیکرٹریٹ کی طرف آنے والی گاڑیوں کو بھی متبادل راستوں پر بھیجا جائے گا، جبکہ اس دوران مارگلہ روڈ استعمال کرنے کی تجویز دی گئی ہے۔

نادرا ہیڈکوارٹرز سے ریڈیو پاکستان چوک تک جانے والے راستے پر بھی ٹریفک کی نقل و حرکت محدود کی جا سکتی ہے۔ شہری اس حصے سے گزرنے کے لیے جناح ایونیو اور مارگلہ روڈ کا انتخاب کر سکتے ہیں۔اسلام آباد ٹریفک پولیس کا کہنا ہے کہ کشمیر واک کے شرکاء کی آمدورفت کو منظم رکھنے اور عام شہریوں کو ٹریفک کی ممکنہ دشواریوں سے محفوظ رکھنے کے لیے خصوصی انتظامات کیے گئے ہیں۔واک میں شرکت کرنے والے افراد کی سہولت کے لیے پارکنگ کا الگ منصوبہ بھی ترتیب دیا گیا ہے۔ اس کے تحت وی آئی پیز کی گاڑیوں کو ڈی چوک پریڈ گراؤنڈ میں پارک کرنے کی اجازت ہوگی، جبکہ عام شرکاء اپنی گاڑیاں نیشنل لائبریری میں مختص کردہ پارکنگ ایریا میں کھڑی کر سکیں گے۔ٹریفک پولیس نے شہریوں سے اپیل کی ہے کہ وہ سڑکوں پر گاڑیاں غیر ضروری طور پر پارک کرنے سے اجتناب کریں اور ٹریفک کی روانی برقرار رکھنے میں تعاون کریں۔ حکام نے مزید ہدایت کی ہے کہ صبح 7 بجے سے واک ختم ہونے تک متبادل راستے استعمال کیے جائیں اور دورانِ سفر ٹریفک اہلکاروں کی ہدایات پر عمل کیا جائے۔