اسلام آباد (نیوز ڈیسک) سینئر صحافی اعزاز سید نے اپنے وی لاگ میں سرگودھا کی تحصیل کوٹ مومن سے تعلق رکھنے والی ایک خاتون پٹواری کے مبینہ جعلی نکاح اور دستاویزات کے معاملے سے متعلق تفصیلات بیان کی ہیں۔
ان کے مطابق خاتون نے اپریل 2024 میں اپنی مرضی سے صغیر احمد نامی شخص سے شادی کی، تاہم شوہر نے نکاح کو سرکاری طور پر رجسٹرڈ کرانے سے گریز کیا۔ خاتون مسلسل شادی کی رجسٹریشن کا مطالبہ کرتی رہی تاکہ آئندہ اپنی بیٹی کی پیدائش کا اندراج بھی قانونی طور پر کرا سکے، لیکن اس کی کوششیں کامیاب نہ ہو سکیں۔اعزاز سید کے مطابق جنوری 2025 میں بچی کی پیدائش کے بعد بھی نکاح رجسٹر نہ ہونے پر خاتون نے وزیراعلیٰ پنجاب مریم نواز کو آن لائن شکایت بھیجی، جس پر متعلقہ حکام کو تحقیقات کی ہدایت جاری کی گئی۔ انکوائری کے دوران معاملہ ڈی ایس پی کوٹ مومن تک پہنچا۔وی لاگ میں دعویٰ کیا گیا کہ تفتیش کے دوران صغیر احمد اور اس کے بھائی، ایڈووکیٹ تنویر، نے مؤقف اختیار کیا کہ مذکورہ خاتون ان کی بیوی نہیں اور نہ ہی بچی ان کی اولاد ہے۔ ان کا کہنا تھا کہ خاتون پہلے ہی کسی اور شخص کی اہلیہ ہے۔ اس دعوے کے حق میں ایک مبینہ نکاح نامہ اور بچی کی رجسٹریشن سے متعلق دستاویزات بھی پیش کیے گئے، جن میں نکاح راولپنڈی اور بچی کی پیدائش کراچی ظاہر کی گئی تھی۔اعزاز سید کے مطابق بعد ازاں دونوں بھائیوں نے بھلوال میں ایک اور مقدمہ درج کرایا،
جس میں مؤقف اختیار کیا گیا کہ خاتون ایک دوسرے شخص کے ساتھ چلی گئی ہے۔ بتایا گیا کہ جس شخص کا نام مقدمے میں شامل کیا گیا وہ مختار نامی ملازم ہے، اور مبینہ طور پر اسی کے ذریعے جعلی نکاح کی دستاویزات تیار کی گئیں۔وی لاگ کے مطابق متاثرہ خاتون کی وکیل نے الزام عائد کیا کہ چونکہ مرکزی ملزم پیشے کے اعتبار سے وکیل ہے، اس لیے مقامی وکلا کی بڑی تعداد نے خاتون کا مقدمہ لینے سے انکار کر دیا، جبکہ عدالتی کارروائی پر اثرانداز ہونے کی بھی کوششیں کی جاتی رہیں۔اعزاز سید کا کہنا ہے کہ خاتون نے پیش کیے گئے تمام نکاح ناموں اور دیگر ریکارڈ کو جعلی قرار دیا، جس پر ڈی ایس پی نے معاملے کی حقیقت جاننے کے لیے ڈی این اے ٹیسٹ کی تجویز دی۔ ان کے بقول اسی دوران صغیر احمد نے مبینہ طور پر اعتراف کیا کہ خاتون اس کی اہلیہ اور بچی اس کی بیٹی ہے۔صحافی کے مطابق اس پیش رفت کے بعد صغیر احمد اور ایڈووکیٹ تنویر کے خلاف تھانہ کوٹ مومن میں مقدمہ درج کر لیا گیا، جبکہ معاملے کی مزید قانونی کارروائی جاری ہے۔
