اسلام آباد (نیوز ڈیسک)وفاقی دارالحکومت اسلام آباد میں قیدیوں کو منتقل کرنے والی جیل وین سے متعدد قیدی فرار ہونے کا واقعہ پیش آیا ہے،
جس کے بعد قانون نافذ کرنے والے اداروں نے فوری کارروائی شروع کر دی۔میڈیا رپورٹس کے مطابق اڈیالہ جیل سے تعلق رکھنے والی ایک پریزن وین میں مجموعی طور پر 34 قیدی سوار تھے جنہیں عدالتی کارروائی کے بعد دوبارہ جیل منتقل کیا جا رہا تھا۔ اس دوران اسلام آباد کے علاقے چکیاں اسٹاپ کے قریب اچانک 14 قیدی وین سے فرار ہونے میں کامیاب ہو گئے۔واقعے کی اطلاع ملتے ہی پولیس اور دیگر سیکیورٹی ادارے متحرک ہو گئے اور مختلف مقامات پر ناکہ بندی کر دی گئی۔ ابتدائی کارروائی کے دوران فرار ہونے والے چار قیدیوں کو دوبارہ گرفتار کر لیا گیا۔
پولیس حکام کے مطابق باقی دس قیدیوں کی گرفتاری کے لیے سرچ آپریشن جاری ہے اور مختلف علاقوں میں چھاپے مارے جا رہے ہیں۔ حکام کا کہنا ہے کہ فرار ہونے والے تمام قیدیوں کو جلد قانون کی گرفت میں لانے کے لیے بھرپور کوششیں کی جا رہی ہیں۔واقعے کے بعد پریزن وین کی سیکیورٹی اور قیدیوں کی منتقلی کے انتظامات کے حوالے سے بھی تحقیقات کا آغاز کر دیا گیا ہے تاکہ فرار کے اس واقعے کی وجوہات اور ممکنہ غفلت کا تعین کیا جا سکے۔
