اسلام آباد (نیوز ڈ یسک)وفاقی دارالحکومت اسلام آباد میں جدید سہولیات سے آراستہ اور عالمی معیار کے پہلے وائلڈ لائف سفاری پارک کے قیام کا فیصلہ کر لیا گیا ہے،
جس کا مقصد سیاحت، تفریح اور جنگلی حیات کے تحفظ کو فروغ دینا ہے۔کیپیٹل ڈویلپمنٹ اتھارٹی (سی ڈی اے) کے ترجمان کے مطابق بارہ کہو کے قریب تقریباً 350 ایکڑ رقبے پر یہ بڑا منصوبہ تعمیر کیا جائے گا۔ اس سفاری پارک کو اس انداز میں ڈیزائن کیا جا رہا ہے کہ شہریوں کو بین الاقوامی معیار کے جنگلی حیات کے تجربات پاکستان ہی میں میسر آ سکیں۔سی ڈی اے حکام کا کہنا ہے کہ مجوزہ سفاری پارک ماحول دوست سیاحت کو فروغ دینے کے ساتھ ساتھ جنگلی حیات کے تحفظ اور خاندانوں کے لیے معیاری تفریحی سہولیات فراہم کرنے میں بھی اہم کردار ادا کرے گا۔
ترجمان کے مطابق یہ منصوبہ نہ صرف اسلام آباد کی سیاحتی اہمیت میں اضافہ کرے گا بلکہ مقامی اور غیر ملکی سیاحوں کے لیے بھی ایک نئی اور منفرد تفریحی منزل ثابت ہوگا۔
