اسلام آباد (نیوز ڈ یسک) جیو نیوز نے 10 محرم الحرام کے موقع پر نشر ہونے والے پروگرام ’’سفرِ عشق‘‘ کے دوران سامنے آنے والی غلطی کو تسلیم کرتے ہوئے ناظرین سے باضابطہ معذرت کر لی ہے۔

نجی ٹی وی چینل کی جانب سے جاری وضاحتی بیان میں کہا گیا کہ پروگرام میں عراق اور مشرقِ وسطیٰ کے چند دیگر ممالک میں محدود پیمانے پر ادا کی جانے والی بعض مذہبی رسومات کو دکھایا گیا تھا۔ ادارے کے مطابق ان مناظر کا مقصد کسی خاص مذہبی نقطۂ نظر کی نمائندگی، ترویج یا حمایت ہرگز نہیں تھا بلکہ یہ صرف مقامی روایات کی عکاسی تھی۔

بیان میں مزید کہا گیا کہ متنازع مواد جیو نیوز کی اپنی تیاری نہیں تھا اور نہ ہی اسے کسی مخصوص مقصد یا نیت کے تحت نشر کیا گیا۔ ادارے نے واضح کیا کہ وہ ہمیشہ مسلم امہ کے متفقہ عقائد اور مذہبی حساسیتوں کے احترام کی پالیسی پر کاربند رہا ہے اور مذکورہ مواد ادارے کے نظریات یا ادارتی مؤقف کی نمائندگی نہیں کرتا۔

جیو نیوز کے مطابق اعتراضات سامنے آنے کے فوراً بعد متعلقہ مواد کو ہٹا دیا گیا اور اس معاملے میں ذمہ دار افراد کے خلاف فوری کارروائی بھی کی گئی۔ ادارے کا کہنا ہے کہ عوامی ردعمل سے قبل ہی وضاحتی بیان اور معذرت نشر کر دی گئی تھی۔

ادارے نے اس واقعے پر افسوس کا اظہار کرتے ہوئے یقین دہانی کرائی کہ مستقبل میں مذہبی احترام اور ذمہ دارانہ صحافت کے اصولوں کو مزید مؤثر انداز میں یقینی بنایا جائے گا۔

دوسری جانب پاکستان الیکٹرانک میڈیا ریگولیٹری اتھارٹی (پیمرا) نے پروگرام ’’سفرِ عشق‘‘ میں مذہبی مواد کی متنازع پیشکش پر جیو نیوز کی نشریات 15 روز کے لیے معطل کرنے کا فیصلہ کیا ہے۔

پیمرا کے مطابق 10 محرم الحرام، 26 جون 2026 کو نشر کیے گئے پروگرام میں ایسے مناظر شامل تھے جو ادارے کے لائسنس کی شرائط اور مذہبی، سماجی و ثقافتی اقدار سے مطابقت نہیں رکھتے۔

اتھارٹی کی جانب سے جاری حکم کے بعد جیو نیوز کی نشریات عارضی طور پر بند کر دی گئیں، جبکہ کیبل نیٹ ورکس پر چینل کی جگہ یہ پیغام دکھایا جا رہا ہے کہ چینل کو پیمرا کی ہدایات کے مطابق آف ایئر کر دیا گیا ہے۔