اسلام آباد (نیوز ڈیسک )42 سالہ پاکستانی حاجی کو دوران حج پانچ مرتبہ دل کا شدید دورہ پڑا، لیکن سعودی عرب کی وزارت صحت سے منسلک ماہر طبی ٹیم نے فوری اور بروقت اقدامات کے ذریعے ان کی جان بچالی۔پی ٹی وی کی رپورٹ کے مطابق، مکہ ہیلتھ کیئر کلسٹر کے حکام نے بتایا کہ مذکورہ حاجی کو حج کے دوران اچانک دل کا دورہ پڑا، جس کے بعد انہیں فوری طور پر مشرقی عرفات اسپتال منتقل کیا گیا، جہاں ان کی حالت نازک قرار دی گئی۔اسپتال ذرائع کے مطابق، مریض کا دل بار بار بند ہونے لگا، جس کے بعد اسے انتہائی نگہداشت یونٹ میں منتقل کردیا گیا۔ ڈاکٹرز نے متعدد بار اس کی طبی بحالی کی کوششیں کیں، لیکن حالت خطرے سے باہر نہ نکل سکی۔
حاجی کو بعد ازاں “ای سی ایم او” مشین سے منسلک کیا گیا تاکہ جسم کے اہم اعضا کو آکسیجن کی فراہمی جاری رکھی جا سکے۔ اس کے بعد انہیں فضائی ایمبولینس کے ذریعے کنگ عبداللہ میڈیکل سٹی منتقل کیا گیا، جہاں وہ وینٹیلیٹر پر رکھے گئے۔کارڈیالوجی کے ماہرین کی ٹیم نے ایمرجنسی میں مریض کی اینجوپلاسٹی کی، جس کے ذریعے دل کی بند شریانوں کو کھولا گیا۔ اس کے ساتھ دل کی کارکردگی کو برقرار رکھنے کے لیے ایک خصوصی ڈیوائس بھی نصب کی گئی۔علاج کے دوران مریض کو دل کی بیماری کے ساتھ ساتھ نمونیا جیسی پیچیدگیوں کا بھی سامنا رہا، تاہم مسلسل نگرانی اور علاج کے باعث رفتہ رفتہ ان کی حالت میں بہتری آئی۔حکام کے مطابق، وقت گزرنے کے ساتھ مریض کی طبیعت سنبھل گئی اور انہیں وینٹیلیٹر اور ای سی ایم او سے ہٹا لیا گیا۔ آخرکار 17 جون کو ڈاکٹروں نے مریض کی مکمل صحتیابی کی تصدیق کردی اور بتایا کہ اب وہ بحالی کے مرحلے میں داخل ہو چکے ہیں اور معمول کی زندگی کی طرف لوٹ رہے ہیں۔
