اسلام آباد (نیوز ڈیسک) کراچی کے پوش علاقے ڈیفنس سے طویل عرصے سے خدمات انجام دینے والی ایک گھریلو ملازمہ کو پانچ کروڑ روپے کی خطیر رقم چرانے کے الزام میں پولیس نے حراست میں لے لیا ہے۔

پولیس کے مطابق، مذکورہ ملازمہ 2013 سے ڈیفنس فیز 5 میں واقع ایک بنگلے میں کام کر رہی تھی۔ دورانِ ملازمت اس نے وقفے وقفے سے کروڑوں روپے چوری کیے۔ متاثرہ گھر کی مالکن کی جانب سے 16 جون کو کلفٹن تھانے میں شکایت درج کروائی گئی، جس کے بعد پولیس نے تفتیش کا آغاز کیا اور کامیاب کارروائی کے دوران خاتون کو گرفتار کرلیا۔

تفتیش کے دوران ملازمہ نے اعتراف کیا کہ اس نے بنگلے سے چوری کیے گئے پیسوں سے مختلف اثاثے بنائے۔ پولیس کا کہنا ہے کہ ملزمہ نے کراچی کے علاقے گزری میں 50 لاکھ روپے کا فلیٹ خریدا، پنجاب میں 36 لاکھ کے دو پلاٹ حاصل کیے، ایک کروڑ روپے کی لگژری گاڑیاں اور 70 لاکھ کی مالیت کی ایک دکان بھی اپنے نام کروائی۔

پولیس نے مزید انکشاف کیا کہ ملزمہ کے قبضے سے کئی قیمتی اشیاء برآمد ہوئیں جن میں متعدد گاڑیاں، موٹر سائیکلیں اور 46 لاکھ روپے نقد شامل ہیں۔ اس کے علاوہ، خریدی گئی دکانیں اور جائیدادیں بھی سیل کر دی گئی ہیں۔ تفتیشی حکام کے مطابق، تمام کارروائیاں خاتون نے تنِ تنہا کیں اور اس میں کوئی اور ملوث نہیں پایا گیا۔

متاثرہ بنگلے کی مالکن نے بتایا کہ ان کے شوہر بیرون ملک مقیم ہیں اور وہاں کاروبار کرتے ہیں، جبکہ یہ ملازمہ پچھلے 13 سال سے ان کے گھر میں کام کر رہی تھی۔ انہوں نے الزام لگایا کہ مذکورہ ملازمہ نے اعتماد کا ناجائز فائدہ اٹھاتے ہوئے پانچ کروڑ روپے کی رقم چوری کی۔