اسلام آباد (نیوز ڈیسک) محکمہ موسمیات کے ڈائریکٹر جنرل، مہر صاحبزادہ خان نے پیش گوئی کی ہے کہ ملک میں رواں سال مون سون کا موسم 15 جون سے شروع ہو سکتا ہے اور یہ سلسلہ 15 ستمبر تک جاری رہنے کی توقع ہے۔
انہوں نے کہا کہ اگرچہ عمومی طور پر مون سون کا دورانیہ تین ماہ پر محیط ہوتا ہے، تاہم اس مرتبہ اس کے جلد شروع ہونے اور ممکنہ طور پر دیر سے ختم ہونے کے آثار بھی نظر آ رہے ہیں۔
ڈی جی موسمیات کے مطابق، شمال مشرقی پنجاب، آزاد کشمیر اور ملک کے وسطی و جنوبی علاقوں میں موسلادھار بارشوں کا امکان ہے۔ اس کے برعکس، گلگت بلتستان اور خیبر پختونخوا کے شمالی علاقوں میں معمول سے کم بارشیں متوقع ہیں، تاہم وہاں درجہ حرارت بلند رہنے کی پیشگوئی کی گئی ہے۔
دوسری جانب، نیشنل ڈیزاسٹر مینجمنٹ اتھارٹی (این ڈی ایم اے) کے چیئرمین لیفٹیننٹ جنرل انعام حیدر ملک نے ایک بیان میں کہا ہے کہ مون سون سسٹم کے 26 یا 27 جون کو ملک میں داخل ہونے کے امکانات ہیں۔ ان کے مطابق اگرچہ روایتی طور پر مون سون جولائی کے آغاز سے 15 ستمبر تک جاری رہتا ہے، لیکن اس برس اس کے معمول سے چند دن پہلے شروع ہونے کی توقع ہے۔
چیئرمین این ڈی ایم اے نے اس بات کی بھی نشاندہی کی کہ 2025 کا مون سون معمول سے زیادہ بارشیں لے کر آ سکتا ہے، لہٰذا متعلقہ اداروں اور عوام کو پیشگی حفاظتی اقدامات کرنے کی ضرورت ہے۔
