اسلام آباد (نیوز ڈیسک)محکمہ موسمیات کی جانب سے ملک کے مختلف علاقوں میں بارش اور برفباری کی پیشگوئی کی گئی ہے۔ اسلام آباد اور گردونواح میں مطلع جزوی طور پر ابر آلود رہنے کا امکان ہے، جبکہ دن کے اوقات میں تیز ہواؤں اور گرج چمک کے ساتھ بارش متوقع ہے۔خیبر پختونخوا میں موسم سرد رہے گا، اور کئی اضلاع میں مطلع جزوی طور پر ابر آلود ہوگا۔

پشاور سمیت صوبے کے مختلف علاقوں میں آئندہ 24 گھنٹوں کے دوران بارش ہوسکتی ہے۔ بالائی علاقوں جیسے دیر، چترال، کوہستان، سوات، شانگلہ، مانسہرہ، بٹگرام، بونیر، ایبٹ آباد، صوابی، مردان، مالاکنڈ، باجوڑ، نوشہرہ، پشاور اور چارسدہ میں گرج چمک کے ساتھ بارش اور پہاڑوں پر برفباری کا امکان ظاہر کیا گیا ہے۔پنجاب کے بیشتر اضلاع میں بھی موسم سرد اور مطلع جزوی ابر آلود رہنے کی توقع ہے۔ راولپنڈی، اٹک، جہلم، گجرات، چکوال، گوجرانوالہ، سیالکوٹ، نارووال، لاہور، اوکاڑہ، قصور، بہاولنگر، بہاولپور، شیخوپورہ اور ان کے گردونواح میں وقفے وقفے سے گرج چمک کے ساتھ بارش ہو سکتی ہے، جبکہ کچھ مقامات پر ژالہ باری کا بھی امکان ہے۔

مری، گلیات اور ملحقہ علاقوں میں بارش اور برفباری کی توقع کی جارہی ہے۔ لاہور میں درجہ حرارت کم سے کم 14 اور زیادہ سے زیادہ 23 ڈگری سینٹی گریڈ رہنے کا امکان ہے۔کراچی میں مطلع جزوی طور پر ابر آلود رہ سکتا ہے، اور شہر کے مضافاتی علاقوں میں بوندا باندی یا ہلکی پھوار پڑنے کی توقع ہے۔ تاہم، تیز بارش کے امکانات نہیں ہیں۔ بلوچستان کے کئی اضلاع میں بھی موسم سرد رہے گا، جبکہ کوئٹہ، زیارت، چمن، پشین، قلعہ عبداللہ، قلعہ سیف اللہ، قلات، ژوب، موسیٰ خیل، لورالائی، بارکھان، سبی، خضدار اور دیگر علاقوں میں گرج چمک کے ساتھ بارش اور پہاڑوں پر برفباری ہو سکتی ہے۔کشمیر اور گلگت بلتستان میں بھی وقفے وقفے سے بارش اور برفباری کا امکان ہے۔

محکمہ موسمیات نے شہریوں کو محتاط رہنے اور غیر ضروری سفر سے گریز کرنے کی ہدایت کی ہے، خاص طور پر ان علاقوں میں جہاں شدید بارش اور برفباری کی توقع ہے۔ بعض مقامات پر درجہ حرارت نقطہ انجماد سے نیچے جا سکتا ہے، جیسے لہہ میں منفی 4، پاراچنار میں منفی 3، گوپس اور بگروٹ میں منفی 2 جبکہ مالم جبہ میں منفی 1 ڈگری سینٹی گریڈ ریکارڈ کیا گیا ہے۔