اسلام آباد(این این آئی)بانی پاکستان تحریک انصاف کے وکیل بیرسٹر سلمان صفدر نے 190 ملین پاؤنڈ فیصلے کے خلاف اپیل تیار کرلی۔عمران خان کے وکیل بیرسٹر سلمان صفدر نے بتایاہے کہ 190 ملین پاؤنڈ کیس کے فیصلے کے خلاف20 صفحات پر مشتمل اپیل تیار کرلی گئی ہے، اپیل کا ڈرافٹ بانی پی ٹی آئی کو فراہم کردیا گیا ہے۔
سلمان صفدر نے کہاکہ عمران خان ایک دو روز مطالعہ کرنے کے بعد اپیل کی منظوری دیں گے، اپیل میں انگلینڈ اینڈ ویلز کی عدالت کا فیصلہ منسلک کیا گیا ہے۔ اپیل میں نیب کی جانب سے پہلی انکوائری بند کرنے کا ذکر بھی کیا ہے۔ عدالتی فیصلے سے قبل فیصلہ ریلیز ہونے کا اعتراض بھی اپیل میں اٹھایا ہے۔ انگلینڈ اینڈ ویلز عدالت کا فیصلہ ہمارے پاس 190 ملین پاؤنڈ فیصلے کے بعد سامنے آیا۔
