اسلام آباد(این این آئی)رہنما تحریک انصاف شیرافضل مروت نے کہا ہے کہ عمران خان کسی ایگزیکٹو آرڈر کے تحت رہائی نہیں لیں گے۔نجی ٹی وی کے پروگرام گفتگو کرتے ہوئے شیر افضل مروت نے کہا کہ فیصلہ ملتوی ہوتا ہے یا نہیں (آج)پیرکو پتہ چلے گا، اگر 190ملین پاؤنڈ ریفرنس کا فیصلہ ملتوی ہوتا ہے تواچھا شگون ہوگا۔انہوں نے کہاکہ عمرن خان نے گھر میں نظربندی سے متعلق آفر بارے بتایا تھا، آفر اسٹیبلشمنٹ کے ذریعے آئی تھی، یہ آفر بیرسٹر گوہر کے ذریعے پہنچائی گئی تھی۔رہنما تحریک انصاف نے کہا کہ جومیں نے بات کی تھی وہ بانی پی ٹی آئی نے خود کی تھی، میں نے بیان دینے کا استحقاق سلمان اکرم راجہ سے مانگا ہی نہیں۔

شیرافضل مروت نے کہا کہ ایگزیکٹوآرڈرکوئی ایسا قانون نہیں جس کے تحت حکومت بانی کورہا کرے، بانی پی ٹی آئی کسی ایگزیکٹوآرڈرکے تحت رہائی نہیں لیں گے۔انہوںنے کہاکہ تحریری مطالبات سے متعلق بیانات حکومت کا سیاسی ہدف ہے، حکومت چاہتی ہے کہ وہ بتائے کہ ہم نے مینڈیٹ مان لیا، عمران خان نے31جنوری کومذاکرات مکمل کرنے کی ڈیڈ لائن دی ہے، یہ ڈیڈ لائن اپنی رہائی سے متعلق نہیں دی۔رہنما تحریک انصاف نے دعویٰ کیا کہ سوا دوماہ کے اندرعمران خان کی رہائی ہو جائے گی۔