لاہور (این این آئی)انسداد دہشت گردی عدالت لاہور نے جناح ہاؤس حملہ کیس میں پاکستان تحریک انصاف کے رہنماؤں عالیہ حمزہ ملک اور طیبہ راجا سمیت 11 ملزمان کے وارنٹ گرفتاری جاری کر دئیے۔انسداد دہشتگری عدالت کے جج منظر علی گل نے جن ملزمان کے وارنٹ گرفتاری جاری کیے، ان میں عطا الرحمٰن، ارباز خان، عبد الرزاق، علی اسد، ہاشم مقصود، فرحان بخاری، عاطف منیر، صغیر کمال، عباس علی اور عمران شامل ہیں۔عدالت نے حکم دیا کہ ملزمان کو گرفتار کرکے 19 دسمبر کو پیش کیا جائے ادھر، انسداد دہشت گردی عدالت لاہور نے تھانہ شادمان جلاؤ گھیراؤ کا مقدمے میں پی ٹی آئی رہنما عالیہ حمزہ کے ضامن کے خلاف کاروائی شروع کردی۔
انسداد دہشتگردی عدالت کے ایڈمن جج منظر علی گل نے عالیہ حمزہ کے ضامن کو 20 دسمبر کے لیے طلبی کے نوٹس جاری کر دیے۔نوٹس کے متن میں کہا گیا کہ اگر پیش نہ ہوا تو عدالت ضامن کی گرفتاری کا حکم دے سکتی ہے۔عدالت نے ریمارکس دیے کہ عالیہ حمزہ ضمانت کرانے کے بعد پیش نہیں ہو رہیں، ایس ایچ او تھانہ شادمان کو حکم دیا گیا ہے کہ ضامن کو 20 دسمبر کو پیش کرے۔واضح رہے کہ 30 نومبر کو انسداد دہشت گردی عدالت لاہور نے سابق وزیراعظم و بانی پی ٹی آئی عمران خان کو جناح ہاؤس حملہ کیس میں قصور وار قرار دے دیا تھا جبکہ عدالت نے عمران خان کی ہنگامہ آرائی کے وقت زیر حراست ہونے کی دلیل بے وزن قرار دے دی تھی۔
عدالتی فیصلے میں کہا گیا تھا کہ پراسکیوشن کے مطابق خفیہ پولیس اہلکاروں نے خود کو پی ٹی آئی ورکرز ظاہر کرتے ہوئے اس سازش کو سنا تھا۔کہا گیا تھا کہ بانی پی ٹی آئی پر الزام ہے کہ انہوں نے اپنی ممکنہ گرفتاری کے حوالے سے ایک سازش تیار کی کہ گرفتاری کی صورت میں دیگر قیادت ریاستی مشینری کو جام کردے۔
