اسلام آباد (این این آئی)نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر (این ای او سی) نے پیش گوئی کی ہے کہ اگلے 3 دنوں میں ملک کے مختلف حصوں میں بارش متوقع ہے۔ جمعہ کواین ای او سی نے الرٹ نے جاری کرتے ہوئے کہا ہے کہ بارش 50 سے 100 ملی میٹر سے زیادہ ہونے کی صورت میں یہ مقامی ندی نالوں میں اربن فلڈ/شدید سیلاب کا باعث بن سکتی ہے۔ گوجرانوالہ، لاہور، سیالکوٹ اور راولپنڈی میں ممکنہ طور پر اربن فلڈ ہوسکتی ہے جبکہ گلیات، کشمیر، کوہستان، مانسہرہ اور مری میں لینڈ سلائیڈنگ اور سیلاب کا خطرہ ہے۔

این ڈی ایم اے نے پی ڈی ایم اے اور مقامی انتظامیہ کو مشورہ دیا ہے کہ وہ صورتحال پر گہری نظر رکھیں اور خطرے کی زد میں آنے والی آبادی کے تحفظ کے لیے مناسب اقدامات کریں۔ عوام کو مشورہ دیا گیا ہے کہ وہ گھریلو نکاسی آب کے نظام کو برقرار رکھنے سمیت ابتدائی اقدامات کریں، بند نالوں یا ممکنہ خطرات کی اطلاع مقامی حکام کو فوری طور پر دیں۔ لوگوں کو مزید مشورہ دیا گیا ہے کہ وہ لینڈ سلائیڈنگ والے علاقوں میں سفر کرتے ہوئے احتیاط کریں، خطرے میں پڑنے والی کمیونٹیز کو مقامی حکام کی ہدایات پر عمل کرنے کا بھی مشورہ دیا گیا ہے جبکہ عوام سے کہا گیا ہے کہ وہ بروقت ڈیزاسٹر الرٹس، گائیڈ لائنز اور احتیاطی تدابیر کے لیے نیشنل ڈیزاسٹر مینجمنٹ اتھارٹی کی پاک این ڈی ایم اے ڈیزاسٹر الرٹ’ موبائل ایپ ڈاؤن لوڈ کریں۔