اسلام آباد (این این آئی) چیئرمین پی ٹی آئی عمران خان نے کہا ہے کہ سازش کرنے والوں پرکوئی کیس نہیں لیکن جس نے سازش بے نقاب کی اسے سزادی جارہی ہے،نواز شریف نے اپنی سیاست ختم کرلی ہے، 9مئی کے واقعے کی پوری تحقیقات ہونا چاہئیں، اسلام آباد ہائیکورٹ اور وڈیشل کمپلیکس کی سی سی ٹی وی فوٹیجزکیوں سامنے نہیں آرہیں۔

تفصیلات کے مطابق بانی پی ٹی آئی سے ملاقات کے بعد اڈیالہ جیل کے باہر میڈیا سے گفتگو کرتے ہوئے پی ٹی آئی وکیل نعیم پنجھوتھا نے بتایا کہ عمران خان نے کہاہے کہ مجھے سیکریٹ ایکٹ کے تحت کارروائی کاکہا گیا لیکن میں حقیقی آزادی کیلئے ڈٹ گیا، یہاں بڑے چوروں کو کلین چٹ دیدی جاتی ہے، سازش کرنے والوں پرکوئی کیس نہیں لیکن جس نے سازش کو ایکسپوزکیا اسے سزادی جارہی ہے۔نعیم پنجوتھا نے کہا کہ عمران خان نے کہا ہے کہ عون چوہدری گواہ ہے جو ہمیں الیکشن سے باہر رکھنا چاہتے ہیں انہی کو ہمارے خلاف گواہ بنایا گیا تو ایسی گواہی کی کیا ویلیو ہو گی۔

انہوں نے بتایا کہ بانی پی ٹی آئی نے کہا ہے کہ توشہ خانہ میں اشیا لینے کیلئے جو قانون تھا وہ پورا کیا گیا ہے، جس گاڑی کو توشہ خانہ سے لے ہی نہیں سکتے تھے اس پر کوئی سوال نہیں اٹھایا گیا۔ جان بوجھ کر ایسے مقدمات بنائے گئے ہیں۔نعیم پنجوتھا نے بتایا کہ عمران خان نے کہا ہے کہ 12ماہ سے ہماری درخواست ہائیکورٹ میں پینڈنگ ہے،نہ درخواست واپس لینے دی جارہی اورنہ کیس چلنے دیا جارہا ہے۔انہوں نے کہا ہے کہ نوازشریف نے اپنی سیاست ختم کرلی ہے۔انہوں نے بتایا کہ عمران خان نے کہا ہے کہ 9مئی کے واقعے کی پوری تحقیقات ہونا چاہئیں،اسلام آباد ہائیکورٹ اور وڈیشل کمپلیکس کی سی سی ٹی وی فوٹیجزکیو سامنے نہیں آرہیں۔