کراچی(این این آئی)کراچی پولیس نے رانی پور میں بچے سے بکرا چھیننے والے اے ایس آئی کو گرفتار کر لیاہے۔پولیس حکام نے بتایا کہ انویسٹی گیشن کے اے ایس آئی ہدایت کو کورنگی سے گرفتار کیا گیاہے، اے ایس آئی اور اہلکاروں سے متعلق بکرا چھیننے کی خبر نشر ہوئی تھی۔پولیس کے مطابق اے ایس آئی اور اہلکاروں کے خلاف خیر پور میں مقدمہ درج کیا گیا، واقعے میں ملوث دیگر اہلکاروں کی تلاش جاری ہے۔

چند روز قبل سامنے آئی تھی کہ خیرپور سے کراچی واپس آنے والی انڈسٹریل ایریا پولیس نفری نے ہنگورجہ کے قریب بچوں کو بکریاں چراہتے دیکھا تو ایک بکرا لوٹ کر گاڑی میں ڈالا اور فرار ہوگئے تھے۔متاثرین نے پولیس گاڑی کا پیچھا کیا تو اہلکار ہجوم دیکھ کر ٹھری میرواہ تھانے میں گھس گئے تھے۔ علاقہ مکینوں نے الزام لگایا کہ کراچی پولیس نے اسلحہ دکھا کر بچے سے بکرا چھینا، ٹھری پولیس نے کارروائی کرنے کے بجائے ہم پر لاٹھیاں برسائیں۔ٹھری میرواہ پولیس نے علاقہ مکینوں سے کہا کہ بکرا واپس کر رہے ہیں معاملہ نہ بڑھائیں لیکن متاثرین کارروائی کا مطالبہ کرتے رہے۔