حیدرآباد( این این آئی)مختلف پارٹیوں کے رہنمائوں نے اپنی پارٹیاں چھوڑ کر پیپلزپارٹی میں شامل ہونے کا اعلان کر دیا، پیپلزپارٹی ضلع حیدرآباد کے صدر و ڈپٹی میئر حیدرآباد صغیر احمد قریشی اور سینئر نائب صدر اظہر سیال کی ہدایت پر پیپلزپارٹی حیدرآباد کے سینئر رہنما عبدالمنان صدیقی نے الیکشن مہم کی سرگرمیاں تیز کر دی ہیں، وہ اپنی ٹیم کے ساتھ مختلف علاقوں کا دورہ کر کے پیپلزپارٹی کے چیئرمین بلاول بھٹو زرداری کی اس ملک پاکستان کی ترقی،

عوام کی خوشحالی، تمام قوموں کو متحد کرکے پیار اور امن و آشنی کی سوچ کا پیغام لے کر مختلف پارٹیوں کے مقامی سربراہان سے ملاقاتیں کر کے مذاکرات کے ذریعے پیپلزپارٹی میں شمولیت اختیار کرانے کا سلسلہ تیز کردیا ہے، یونٹ نمبر 5 لطیف آباد حیدرآباد میں پاک سر زمین پارٹی کے سابق ذمہ دار انتظار راجپوت کے آفس میں ایم کیو ایم پاکستان، پی ٹی آئی، پاک سر زمین پارٹی، سنی تحریک اور سماجی تنظیم کے مقامی ذمہ داروں سے ملاقاتیں کی گئیں،

کامیاب مذاکرات کے بعد وہ اپنے ساتھیوں سمیت اپنی پارٹیاں چھوڑ کر پیپلزپارٹی میں شامل ہونے پر آمادہ ہوئے جس کے بعد انہیں پیپلزپارٹی ضلع حیدرآباد کے صدر صغیر احمد قریشی کی رہائش گاہ لایا گیا جہاں پر انہوں نے ضلعی صدر صغیر احمد قریشی اور سینئر نائب صدر اظہر علی سیال پر مکمل اعتماد ظاہر کرتے ہوئے غیرمشروط طور پر پیپلزپارٹی میں شمولیت کا باقاعدہ اعلان کیا، پیپلزپارٹی ضلع حیدرآباد کے صدر صغیر احمد قریشی، سینئر نائب صدر اظہر علی سیال اور پیپلزپارٹی حیدرآباد کے سینئر رہنما عبدالمنان صدیقی نے نئی شمولیت اختیار کرنے والے نوید صدیقی، انتظار راجپوت، شاہد خان لالا، بابر سولنگی، اصغر قریشی، سید امتیاز علی شاہ اور ان کے ساتھیوں کا شکریہ ادا کرتے ہوئے انہیں پیپلزپارٹی میں شامل ہونے پر خوش آمدید کہتے ہوئے مبارکباد دی۔