مری (این این آئی)ضلعی انتظامیہ مری نے سیاحوں کیلئے موسمیاتی اور سفری احتیاطی تدابیر کے حوالے سے ایڈوائزری جاری کر دی ہے۔تفصیلات کے مطابق ایڈوائزری میں سیاحوں کو موسمیاتی صور تحال کے حوالے سے آگاہ کرتے ہوئے بتایا گیا کہ سیاح مری اور دیگر شمالی علاقوں میں سفر پر جانے سے قبل موسمی صور تحال سے آگاہ رہیں،کھانے پینے کا ضروری سامان ، ادویات اور پانی ساتھ رکھیں، سیاح گرم کپڑوں کا استعمال یقینی بنائیں، سفر میں جانے سے پہلے گاڑی کو مکمل طور پر چیک کریں، فیول ٹینک فل کروا لیں۔

برف باری سیزن کے دوران مری میں داخل ہونے والے سیاح حفاظتی ، احتیاطی تدابیر کے طور پر پر انے ٹائز استعمال نہ کریں، ٹائروں میں ہوا کم سے کم رکھیں، برف باری کے دوران ٹائروں کے اوپر چین چڑھائیں تاکہ گاڑی سلپ ہونے سے بچ سکے ۔رپورٹ کے مطابق ایمر جنسی سے نمٹنے کے لیے گاڑی میں ضروری سامان رکھیں،گاڑی سلپ ہونے کی صورت میں بریک کا استعمال کم سے کم کریں۔دوران برف باری گاڑی ہمیشہ ہلکے گیئر میں چلائیں اور محفوظ سفر کیلئے ٹریفک قوانین کی پابندی کریں اور ٹریفک عملہ کے ساتھ تعاون کریں۔

سیاح گاڑی سنگل لائن میں چلائیں اور اوور ٹیکنگ سے گریز کریں، گاڑی سڑک پر رو کنا اور فوٹو گرافی کرنا سخت منع ہے اس سے ٹریفک کی روانی متاثر ہو سکتی ہے۔ایکسپریس وے پر ہر قسم کی مدد کے لیے موٹروے پولیس کی ہیلپ لائن 130 پر کال کریں۔ کسی بھی ایمر جنسی کی صورت میں ریسکو 1122 پر رابطہ کریں۔ضلعی انتظامیہ مری کی جانب سے مری میں سیاحوں کی رہنمائی ، مدد کے لیے مختلف مقامات پر 13 سہولت مراکز قائم کیے گئے ہیں۔