اسلام آباد(این این آئی)ملک میں غیر قانونی مقیم افغان باشندوں کو بسوں اور خصوصی ٹرین سے ان کے وطن بھیجا جائے گا۔اس حوالے سے ذرائع نے بتایاکہ غیر قانونی مقیم افغان باشندوں کو پہلے 3دن بسوں پھر خصوصی ٹرین سے بھیجا جائے گا۔ذرائع کے مطابق نان اسٹاپ ٹرین غیر قانونی مقیم افغان باشندوں کو لے کر براستہ روہڑی چمن بارڈر پہنچے گی،خصوصی ٹرین میں سخت سکیورٹی اور جیل طرز کے انتظامات ہوں گے۔

سرکاری ذرائع کے مطابق خصوصی ٹرین شام کو روانہ ہوگی،دن میں بلوچستان کا سفر کیا جائے گا، پہلے 3دن 10بسوں پر یومیہ 500افغان باشندے چمن بھیجے جائیں گے۔سرکاری ذرائع کے مطابق سخت سکیورٹی میں افغانیوں کو لے جانے والی بسوں کا پہلا اسٹاپ جیکب آباد ہوگا۔ذرائع نے بتایاکہ زیرحراست غیر ملکیوں کو جیکب آباد کے ہولڈنگ سینٹر میں قیام کرایا جائے گاجبکہ چوتھے روز خصوصی ٹرین سے روانگی کیلئے ریلوے نے انتظامات شروع کر دیے ہیں۔ذرائع کے مطابق ٹرین سے روز 800غیر قانونی مقیم افغان باشندوں کو ان کے وطن بھیجا جائے گا۔