اسلام آباد(این این آئی)نگران وزیر داخلہ سرفراز احمد بگٹی نے دو ٹوک الفاظ میں واضح کیا ہے کہ غیر قانونی طور پر مقیم غیر ملکیوں کے انخلا کی مدت میں توسیع کا کوئی امکان نہیں ہے۔

میڈیا سے گفتگو کرتے ہوئے سرفراز بگٹی کا کہنا تھا حکومت کی جانب سے غیر ملکیوں کو دیے گئے الٹی میٹم میں صرف دو روز باقی ہیں، ہم نے جیو میپنگ کر لی ہے اور ہمارا پلان تیار ہے۔

نگران وزیر داخلہ نے کہاکہ کسی ملک میں ایسانہیں ہوتاکہ بغیر سرکاری دستاویز کے 12سے 15ہزار لوگ آتے جاتے رہیں، 31 اکتوبر کے بعد غیر قانونی طور پر مقیم غیر ملکیوں کے لیے کوئی جگہ نہیں ہے۔

انہوں نے کہا کہ قلعہ عبداللہ میں بھی پاسپورٹ آفس شروع کیا جا رہا ہے، بلوچستان کے سرحدی علاقے میں کاروبار پر کوئی پابندی نہیں، ہم نے صرف اسمگلنگ پر پابندی عائد کی ہے۔ایک سوال کے جواب میں نگران وزیر داخلہ نے کہاکہ انتخابات میں سکیورٹی کا چیلنج بہت بڑا ہے تاہم ہم اس چیلنج سے بھی نبردآزما ہوں گے۔