لاہور(این این آئی) پاکستان مسلم لیگ (ن)کے قائد سابق وزیراعظم محمد نوازشریف نے کہاہے کہ کون ہے جو ہر چند سال بعد نواز شریف کو قوم سے جدا کر دیتا ہے؟۔ سابق وزیر اعظم نواز شریف نے مینارِ پاکستان جلسے سے خطاب کرتے ہوئے کہا کہ کہاں سے چھیڑوں فسانہ، کہاں تمام کروں،وہ میری طرف دیکھیں تو میں سلام کروں۔انہوںنے کہاکہ کئی سالوں کے بعد آپ سے ملاقات ہو رہی ہے لیکن آپ سے میرا پیار کا رشتہ قائم و دائم ہے۔ مجھے اس پر ناز ہے۔
انھوں نے کہا کہ یہ رشتہ کئی دہائیوں سے چل رہا ہے، نہ آپ نے کبھی مجھے دھوکہ دیا، نہ نواز شریف نے کبھی آپ کو دھوکہ دیا، جب بھی موقع ملا آپ کی خدمت کی۔انہوںنے کہاکہ مجھے جیلوں میں ڈالا گیا، ملک بدر مجھے کیا، جعلی کیسز میرے خلاف بنائے گئے،شہباز شریف، مریم کے خلاف بنائے گئے لیکن مسلم لیگ کا جھنڈا کسی نے ہاتھ نہیں چھوڑا۔نواز شریف نے کہا کہ مجھے یہ بتائیں، کون ہے جو ہر چند سالوں بعد نواز شریف کو اس کے پیاروں سے، قوم سے جدا کر دیتا ہے،ہم تو پاکستان کی تعمیر کرنے والوں میں سے ہیں، ہم نے تو پاکستان کے لیے ایٹم بم بنایا،ہم نے لوڈ شیڈنگ ختم کی، شروع نہیں کی۔
