کراچی(این این آئی)شہر قائد کے علاقے اتحاد ٹائون میں بھائی نے گھریلو رنجش پر فائرنگ کرکے سگے بھائی اور بھابھی کو قتل کردیا جبکہ پولیس نے ملزم کو گرفتار کرلیا۔تفصیلات کے مطابق اتحاد ٹائون جدہ ہزارہ کالونی میں گھریلو رنجش پر بڑے بھائی نے فائرنگ کرکے چھوٹے بھائی اور بھابھی کو قتل کردیا، ایس ایس پی کیماڑی عارف اسلم رائو کے مطابق اتحاد ٹائون میں فائرنگ کا واقعہ پیش آیا ہے جب گھریلو تنازع پر بڑے بھائی نے فائرنگ کرکے چھوٹے بھائی اور بھابھی کو قتل کردیا ہے جن کی شناخت ابراہیم ولد جمشید اور شکیلہ زوجہ ابراہیم کے نام سے کی گئی ہے۔

اتحاد ٹائون پولیس نے فائرنگ میں ملوث حسین ولد جمشید کو گرفتار کرکے اسلحہ برآمد کرلیا ہے۔پولیس حکام نے بتایا کہ ملزم اپنی بھابھی کو غیرت کے نام پر قتل کرنا چاہتا تھا، مقتول بھائی بیوی کو بچانے کی کوشش کی اور فائرنگ کی زد میں آگیا۔مقتول کا آبائی تعلق سوات سے ہے جبکہ ملزم بھائی اور بھابھی کو قتل کرنے کے بعد گھر میں ہی بیٹھا رہا اہلکار پہنچے تو ملزم نے خود ہی گرفتاری دے دی۔ ایس ایس پی کیماڑی کے مطابق ملزم ابتدائی بیان میں گھریلو تنازع پر فائرنگ کا اعتراف کررہا ہے لیکن وجوہات بتانے سے قاصر ہے اس حوالے سے پولیس تحقیقات کررہی ہے