لاہور( این این آئی) استحکام پاکستان پارٹی کے سینئر رہنما محمودمولوی نے کہا ہے کہ دومزید اہم شخصیات بھی چیئرمین پی ٹی آئی کو چھوڑدیں گی، دونوں اہم شخصیات روپوش ہیں،فرخ حبیب نے جوگفتگو کی ہے یہ حقیقی آزادی ہے، انہوںنے جو باتیں کیں 95 فیصد باتوں کی تائید کرتا ہوں۔ایک انٹر ویو میں انہوں نے کہا کہ بدقسمتی ہے سیاسی جماعتوں میں جمہوریت نہیں ہے، سیاسی جماعتوں میں جمہوریت نہیں ہوگی تو بند گلی میں جائیں گی۔

انہوں نے دعوی کیا کہ دومزیداہم شخصیات بھی چیئرمین پی ٹی آئی کوچھوڑدیں گی، دونوں اہم شخصیات روپوش ہیں اور سوچنے کا وقت لے رہے ہیں، ایک اہم شخصیت کی استحکام پاکستان پارٹی سے بات چیت بھی چل رہی ہے، دونوں اہم شخصیات پی ٹی آئی کی کابینہ لیول کے ہیں۔انہوں نے بتایا کہ علی زیدی استحکام پاکستان پارٹی کاحصہ نہیں ہیں۔محمود مولوی نے مزید کہا کہ سینئر لوگوں نے چیئرمین پی ٹی آئی کو کہا تھا کہ کس طرف جارہے ہیں، کیا پی ٹی آئی کی جانب سے مخصوص جگہوں پر احتجاج کی ہدایت نہیں کی گئی تھی؟ بد قسمتی ہے بڑے لوگوں کووہم ہوجاتاہے کہ جومیں کررہاہوں درست ہے۔