اسلام آباد(این این آئی)استحکام پاکستان پارٹی کی ترجمان فردوس عاشق اعوان نے کہاہے کہ چیئرمین پی ٹی آئی اپنی ذات کے قیدی ہیں،فرخ حبیب نے چیئرمین پی ٹی آئی کے بیانیے کوایکسپوز کیا اور تحریک انصاف کیساتھ اپنے سفرکا اختتام کردیا ہے۔ ٹی وی پروگرام میں گفتگو کرتے ہوئے فردوس عاشق اعوان نے کہا کہ فرخ حبیب نے چیئرمین پی ٹی آئی کے بیانیے کوایکسپوز کیا اور تحریک انصاف کے ساتھ اپنے سفرکا اختتام کردیا ہے،فرخ حبیب کی پارٹی میں شمولیت پرانہیں خوش آمدید کہتی ہوں۔

انہوں نے کہا کہ چیئرمین پی ٹی آئی اپنی ذات کے قیدی ہیں، اختلافات سیاسی جماعتوں سے ہوتے ہیں۔انہوںنے کہاکہ اب صورتحال یہ ہو چکی ہے کہ سربراہ تحریک انصاف کا فین کلب اپنی موت آپ مرچکا ہے۔رہنما آئی پی پی نے کہاکہ جب کوئی کارکن مشکل میں آتا ہے تو قائد اس کے پیچھے کھڑا ہوتا ہے۔فردوس عاشق اعوان نے کہاکہ ہمارے ورکرز اور لیڈرز گراس روٹ لیول پر کام کرر ہے ہیں،آنے والے دنوں میں عوامی رابطہ مہم میں جلسے کریں گے۔انہوںنے کہاکہ اداروں پر حملہ کرنے والوں کو انصاف کے کٹہرے میں لانا ہوگا، اگر پارٹی میں شامل 9مئی واقعات کے ذمہ دارہوئے تو استحکام پاکستان پارٹی ان کا بوجھ نہیں اٹھائے گی۔