اسلام آباد (این این آئی)ملک بھر میں پاسپورٹ کے اجرا کا نیا بحران ،لیمینیشن پیپر ختم ہونے سے پاسپورٹ کی چھپائی کاکام بند ہوگیا ،حکام کی نااہلی کے باعث پاسپورٹ کے لیمینیشن پیپر منگوانے کا بروقت انتظام نہ ہوسکا ،ایک ہفتے سے پاسپورٹ کا لیمینیشن پیپر ختم ہوا تو حکام نے خاموشی اختیار کرلی ۔

ذرائع کے مطابق ایک ہفتے میں پاسپورٹ کا بیک لاک پانچ لاکھ تک پہنچ گیا ،روزانہ بیس سے پچیس ہزار نئے اور تجدید کی درخواستیں موصول ہورہی ہیں ، لیمینیشن پیپر کا آرڈردیا جا چکا ہے پاکستان پہنچنے میں ایک ہفتہ لگے گا۔ ذرائع کے مطابق مزید ایک ہفتہ کسٹم سے لیمینیشن پیپر کلئیر کروانے میں لگ سکتا ہے ، اگلے دو ہفتے میں بیک لاک دس لاکھ تک پہنچنے کا امکان ہے ، بیک لاکھ کو ختم کرنے میں ایک ماہ سے زائد لگ سکتا ہے ۔