کراچی(این این آئی)ملیرکے علاقے سعودآباد میں سرکاری اسکول کے پرنسپل کی جانب سے دسویں جماعت کی طالبات کو ہراساں کرنے پر پولیس نے ملزم کو گرفتار کرلیا۔کراچی میں اسکول پرنسپل کی جانب سے طالبات کو ہراساں کرنے کا ایک اور واقعہ سامنے آگیا،سعود آباد میں سرکاری اسکول کے پرنسپل کی جانب سے دسویں جماعت کی طلبا کو ہراساں کرنے پر پولیس نے گرفتار کرلیا ہے۔
پولیس کے مطابق لڑکیوں کے سرکاری اسکول کاپرنسپل بچیوں کے ساتھ نازیبا حرکات کرتا تھا، بچیوں کے والدین نے تھانہ سعودآباد پولیس کو پرنسپل کی جانب سے ہراساں کرنے سے آگاہ کیا، جس پر فوری ایکشن لیتے ہوئے ایس ایس پی کورنگی نے ملزم کی گرفتاری کا حکم دیا۔پولیس کے مطابق پولیس ٹیم نے اسکول کے ہیڈ ماسٹر اعظم ولد کھوڑو خان کو گرفتار کرلیا ہے اور ملزم کے خلاف مقدمہ درج کرلیا گیا ہے، جب کہ مزید تفتیش جاری ہے۔
