اسلام آباد (این این آئی)پاکستان میں غیر قانونی طور پر مقیم افغان شہریوںکیخلاف ایکشن تیز کرتے ہوئے اسلام آباد کے مارگلہ ٹائون میں غیر قانونی افغان بستی صفحہ ہستی سے مٹا دی گئی۔تفصیلات کے مطابق اسلام آباد میں سی ڈی اے اور ضلعی انتظامیہ نے غیر قانونی طور پر رہائش پذیر افغان شہریوں کیخلاف مشترکہ آپریشن کیا۔آپریشن میں وفاقی پولیس کی معاونت بھی انتظامیہ کو حاصل تھی۔

دورانِ آپریشن ہیوی مشینری کا استعمال کیا گیا اور غیر قانونی تعمیرشدہ گھروں، دکانوں اور تھڑوں کو گرادیا گیا۔دورانِ آپریشن انتظامیہ کو افغان شہریوں کی جانب سے مزاحمت کا سامنا بھی کرنا پڑا تاہم پولیس نے مزاحمت کرنے والے افراد کو منتشر کردیا۔ سی ڈی اے حکام کے مطابق افغان شہریوں نے موہریاں موچی موہڑا کے علاقے میں غیر قانونی قبضہ کر رکھا تھا۔