لاہور( این این آئی ) پاکستان مسلم لیگ (ن) کی سینئر نائب صدر و چیف آرگنائزر مریم نواز نے کہا ہے کہ نواز شریف نے ملک اور قوم کو مسائل سے نکالنے کا ایجنڈا تیار کر لیا ہے، نواز شریف کو ناحق سزا نہ ملتی تو عوام کو آج مہنگائی کی سزا نہ ملتی، ورکرز کنونشن گلگت بلتستان کے عوام کا نواز شریف کے حق میں ریفرنڈم ہے۔ان خیالات کا اظہارا نہوںنے پاکستان مسلم لیگ (ن) کے زیر اہتمام گلگت بلتستان میں منعقدہ ورکرز کنونشن سے بذریعہ ویڈیو لنک خطاب کرتے ہوئے کیا ۔
مریم نواز نے کہا کہ گلگت بلتستان کے عوام کی محبت اور خلوص کا جواب وزیراعظم نواز شریف اس خطے اور عوام کی ترقی کی صورت میں دیں گے، گلگت بلتستان اور یہاں کے بہادر اور وفادار شعار عوام ہمارا فخر ہیں۔ انہوں نے کہا کہ نواز شریف کی قیادت میں مسلم لیگ(ن) نے پاکستان کو ترقی دی، مہنگائی سے عوام کی جان چھڑائی، نواز شریف نے ہمیشہ پاکستان کو ترقی دی، عوام کی زندگیوں میں خوشحالی لائی، نواز شریف گلگت بلتستان سمیت تمام پاکستان کو امن دیں گے، دہشتگردی سے نجات دلائیں گے۔ مریم نواز نے کہا کہ نواز شریف نے لوڈ شیڈنگ اور دہشتگردی ختم کی تھی ، ان شا اللہ پھر قوم کو ان عذابوں سے نجات دیں گے، نواز شریف وعدوں کی تکمیل کا نام ہے، عوام ہمیں ووٹ دیتے ہیں تو نواز شریف کی قیادت میں ہماری حکومت ہمیشہ ڈلیور کرتی ہے، نواز شریف باتیں نہیں کرتا، کام کرتا ہے، ترقی کے ہر منصوبے پر نواز شریف کا نام لکھا ہے۔
انہوںنے کہا کہ نواز شریف قوم کو متحد کرے گا، ترقی کا ایجنڈا دیں گے، نواز شریف نے ملک اور قوم کو مسائل سے نکالنے کا ایجنڈا تیار کر لیا ہے، 2013 سے 2018 کے درمیان ترقی کی شرح 6.1 فیصد اور مہنگائی 3.8 فیصد کی کم ترین شرح پر تھی، نواز شریف کو ناحق سزا نہ ملتی تو عوام کو آج مہنگائی کی سزا نہ ملتی۔ انہوں نے کہا کہ گلگت بلتستان سمیت پورے پاکستان کے نوجوانوں کو تعلیم، روزگار، ہنر اور کاروبار کے مواقع دیں گے، لیپ ٹاپ اور تعلیمی وظائف دیں گے، 21 اکتوبر کو قائد پاکستان کا تاریخی استقبال کریں گے۔
